HƏMYERLİMİZ FİRUDİN SƏFƏROV “TRAVİATA”NI YENİ QURULUŞDA SƏHNƏLƏŞDİRMİŞDİR

27.03.2006 [11:20]
Çap et
A⁺ A^-

AZƏRTAC-ın xüsusi müxbiri xəbər verir ki, Əlişir Nəvai adına Özbəkistan Akademik Opera və Balet Teatrında italyan bəstəkarı Cüzeppe Verdinin “Traviata” operasının yeni quruluşda premyerası olmuşdur. Tamaşanın quruluşçu rejissoru Azərbaycanın və Özbəkistanın xalq artisti Firudin Səfərov, dirijoru xalqımızın dostu, Özbəkistanın xalq artisti Dilbər Əbdürrəhmanovadır.

Tamaşanın təqdimat mərasimində Özbəkistanda fəaliyyət göstərən səfirliklərin, Beynəlxalq təşkilatların nümayəndələri, ədəbiyyat və incəsənət xadimləri, Azərbaycan səfirliyinin əməkdaşları və bu ölkədə yaşayan soydaşlarımız iştirak etmişlər.

Uğurla keçən tamaşanın sonunda İtaliyanın Özbəkistandakı səfiri Anjelo Persiani quruluşçu rejissoru və kollektivi təbrik etmiş, onlara uğurlar arzulamışdır.

Xatırladırıq ki, Cüzeppe Verdinin bu teatrın səhnəsində oynanılan altı operasından beşinin quruluşçu rejissoru Firudin Səfərov olmuşdur.