HƏNİFƏ XANIM MƏLİKOVA ZƏRDABİNİN YUBİLEYİ QEYD OLUNMUŞDUR

01.06.2006 [23:11]
Çap et
A⁺ A^-

AZƏRTAC xəbər verir ki, Həsən bəy Zərdabi adına Dünya Azərbaycanlıları Xeyriyyə Cəmiyyətinin və Bakı Qızlar Universitetinin birgə təşkilatçılığı ilə Azərbaycan Milli Elmlər Akademiyasının Məhəmməd Füzulu adına Əlyazmalar İnstitutunda Həsən bəy Zərdabinin ömür-gün və mübarizə yoldaşı, Azərbaycanın ilk maarifçi qadınlarından biri Hənifə xanım Məlikova Zərdabinin anadan olmasının 150 illik yubileyinə həsr edilmiş elmi-nəzəri konfrans keçirilmişdir.

“Ziyalı qadınlarımızın mənəvi anası - Hənifə xanım Məlikova Zərdabi” mövzusuna həsr olunmuş konfransı cəmiyyətin prezidenti, “Güzgü” qəzetinin baş redaktoru Səttar Zərdabi açaraq, Azərbaycanda qadınlar arasında maarifin təbliğində, onların savadlanmasında Hənifə xanımın fəaliyyətindən ətraflı danışmışdır.

Tarix elmləri doktoru Sabir Gəncəli konfrasda geniş məruzə etmişdir. Bakı Dövlət Universitetinin professorları İzzət Rüstəmov, İfrat Əliyeva, “Xalq qəzeti”nin əməkdaşı, publisist Tahir Aydınoğlu, Milli Məclisin deputatı Jalə Əliyeva və başqaları Azərbaycanda mətbuatın, xeyriyyəçiliyin, teatrın yaradılmasında, mədəniyyətin inkişafında bu qoşa qanadın - Həsən bəyin və Hənifə xanımın xidmətlərindən ətraflı söz açmışlar. Xüsusi vurğulanmışdır ki, Həsən bəy ölkəmizdə təkcə mətbuatın, teatrın, xeyriyyəçiliyin banisi deyil, həm də, bütün dövrlər üçün gənclərə örnək ola biləcək sivil ailənin təməl daşını qoyanlardandır.

Tədbirdə Zərdabilər ailəsinin ciddi tədqiqata ehtiyacı olduğu da nəzərə çarpdırılmışdır.