Hepatit A virusuna yoluxma hallarının artması Avropada həyəcan doğurur
Praqa, 29 aprel, AZƏRTAC
“Çirkli əllər xəstəliyi” kimi də tanınan Hepatit A bu il Avropada əvvəlki dövr ilə müqayisədə daha sürətlə yayılır.
AZƏRTAC xəbər verir ki, təkcə Çexiyada bu xəstəliyə yoluxanların sayı artıq 424 nəfərə çatıb. Bu, ötən ilin müvafiq dövründəki göstəricidən on dəfədən çoxdur. Artıq altı nəfərin infeksiyadan öldüyü bildirilir. Çərşənbə axşamı gününə olan məlumata görə, Praqada üç, Karlovı Varı diyarında, Mərkəzi Çexiya və Ostrava bölgəsinin hər birində bir qurban qeydə alınıb. Ötən il ərzində bu xəstəliyə 636 nəfər yoluxmuşdusa, bu il aprelin 28-nə olan məlumata görə, onların sayı artıq 424-ə çatıb.
Epidemioloqların məlumatına görə, xəstəlik hələ ki, cəmiyyətdə nəzarətsiz yayılır və əsasən həssas rayonları və pis sanitariya şəraitində yaşayan müdafiəsiz insanları əhatə edir. İctimai nəqliyyatda yoluxmaya gəlincə, burada risk hələ ki, azdır. Bəzi nəqliyyat şirkətləri, məsələn, Praqa şirkətində, sərnişinlərin tutduğu tutacaqlar hər gün silinir.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
