HEYDƏR ƏLİYEV LİSEYİNİN DİREKTORU FİKRƏT XƏLİLOVUN ÇIXIŞI
- Hörmətli cənab Prezident!
Hörmətli qonaqlar, şagirdlər, valideynlər, mərasim iştirakçıları!
Heydər Əliyev siyasi məktəbinin ən layiqli yetirməsi, işgüzarlığı ilə xalqın rəğbətini qazanmış hörmətli Prezidentimiz İlham Əliyevin rəhbərliyi sayəsində respublikamızın iqtisadiyyatı günbəgün inkişaf edir.
Müstəqil respublikamızda bütün sahələrdə olduğu kimi, ümummilli liderimiz Heydər Əliyevin imzaladığı “Azərbaycan Respublikasının Təhsil Sahəsində İslahat Proqramı”na uyğun olaraq, təhsil sahəsində də islahatlar çox yüksək səviyyədə aparılır.
Hörmətli cənab Prezident!
Sizin rəhbərliyiniz və qayğınızla islahatlar bu gün də davam etməkdədir. Sizin “Azərbaycan Respublikasında “Bilik günü”nün təsis edilməsi və təhsil müəssisələrində iş rejiminin tənzimlənməsi haqqında” Fərmanınız və “Azərbaycan Respublikasında ümumtəhsil məktəblərinin informasiya və kommunikasiya texnologiyaları ilə təminatı Proqramının (2005-2007-ci illər) təsdiq edilməsi haqqında” Sərəncamınız ölkəmizdə təhsilin inkişafına göstərilən qayğının təzahürüdür.
Təhsil müəssisələrində dərslərin sentyabrın 15-dən başlanması və ümumtəhsil məktəblərinin tədricən beşgünlük iş həftəsinə keçirilməsinin təmin olunması, məktəblərimizin müasir kompüter texnikası ilə təchiz edilməsi bütün təhsil işçilərinin və ictimaiyyətin sevincinə səbəb olmuşdur.
Avropa standartları səviyyəsində olan bu təhsil ocağının istifadəyə verilməsi və ən müasir avadanlıqla təchiz edilməsi Sizin Fərman və Sərəncamlarınızın layiqincə həyata keçirildiyini bir daha əyani surətdə təsdiq edir. Təhsil sahəsində aparılan islahatların nəticəsidir ki, son illərdə ümumtəhsil məktəblərinin şagirdləri üçün 152 adda yeni dərslik və 50-dək adda dərs vəsaiti hazırlanmışdır. 2005/2006-cı dərs ilində liseyimizin bütün 1-11-ci sinif şagirdləri pulsuz dərsliklərlə təmin edilmişlər. Buna görə Sizə pedaqoji kollektivimiz adından dərin təşəkkürümüzü bildiririk.
Son bir neçə ildə təhsil ocaqlarının bərpa olunması, yeni məktəb və sinif otaqlarının tikilməsi, əsaslı təmir işlərinin aparılması hər bir Azərbaycan vətəndaşını sevindirir. Bu işlər Heydər Əliyev Fondunun prezidenti, YUNESKO-nun xoşməramlı səfiri Mehriban xanım Əliyevanın qayğısı sayəsində daha geniş vüsət almışdır.
YUNESKO-nun baş direktorunun Azərbaycana səfəri ilə əlaqədar 2005-ci il avqustun 24-də Gülüstan sarayında “YUNESKO-Azərbaycan: gələcəyə körpü” mövzusunda konfransda “Yeniləşən Azərbaycana yeni məktəb” adlı layihə xüsusilə diqqəti cəlb etdi. Fürsətdən istifadə edərək, Azərbaycan təhsilinə göstərdiyi qayğıya görə Mehriban xanım Əliyevaya dərin minnətdarlığımızı bildiririk.
Zati-aliləri, biz çox sevinirik ki, müdrik və uzaqgörən Heydər Əliyev siyasətinin layiqli davamçısı kimi Siz xalqımızın dahi rəhbərinin Azərbaycan təhsilinə və təhsil işçilərinə qayğısından irəli gələn ənənələri daha da genişləndirirsiniz. Milli mədəniyyətimizin, milli-mənəvi dəyərlərin qorunmasına, təhsilin, elmin inkişafına qayğı göstərməyiniz xalqımız tərəfindən böyük rəğbət və məhəbbətlə qarşılanır.
Bu gün qarşısına toplaşdığımız, əbədiyaşar Prezidentimiz Heydər Əliyevin adını daşıyan, bütün parametrləri üzrə ən inkişaf etmiş ölkələrin təhsil ocaqları səviyyəsində olan bu məktəbin tikilib istifadəyə verilməsi də yuxarıda qeyd edilən diqqət və qayğının bariz nümunəsi, eyni zamanda, unudulmaz rəhbərimiz Heydər Əliyevin əziz xatirəsinə layiqli bir töhfədir.
Liseyə qəbul test sorğusu ilə müsabiqə qaydasında aparılır və ən qabiliyyətli şagirdlər seçilir. Onların təlim-tərbiyəsi ilə məşğul olmaq üçün rayonumuzun, Bakı şəhərinin və respublikamızın məktəblərindən ən qabaqcıl fənn müəllimləri müsabiqə qaydasında işə qəbul edilir. Layihə üzrə liseydə bir növbədə 844 şagird təhsil ala bilər. Hazırda 45 sinifdə 1230 nəfər şagird komplektləşdirilmişdir ki, onların təlim-tərbiyəsi ilə 100-dək müəllim və pedaqoji işçi məşğul olacaqdır.
Möhtərəm Prezidentimiz!
Fürsətdən istifadə edib, Sizə hesabat vermək istərdim ki, fənn olimpiadalarının respublika turunda Xətai rayonunda fəaliyyət göstərən 37 təhsil müəssisəsinin 14 nəfər şagirdi yüksək nəticə qazanmış, bunlardan 8 nəfəri I-II-III yerləri tutaraq, Təhsil Nazirliyinin medalları və xüsusi diplomları ilə təltif edilmişlər. Həmin 8 nəfərin 5-i bizim liseyin şagirdləridir. Bu nəticə liseyə qəbul edilən şagirdlərin və pedaqoji kadrların düzgün seçildiyini bir daha təsdiq edir.
Cənab Prezident!
Sizi əmin etmək istərdim ki, bu yeni tədris ocağına gəlişiniz çox gözəl təhsil ənənələri olan bütün Xətai rayonunun təhsil işçilərini yeni-yeni nailiyyətlər əldə etməyə daha da ruhlandıracaqdır. Bu gün təhsil işçiləri, valideynlər və şagirdlərlə bu görüşünüz, bütövlükdə Azərbaycan təhsilinə əsası dahi rəhbərimiz Heydər Əliyev tərəfindən qoyulmuş diqqətin və dövlət qayğısının təzahürüdür. Liseyimizin pedaqoji kollektivi, rayonun çoxminli müəllimləri adından Sizə bir daha minnətdarlığımı bildirirəm. Çox sağ olun.
Bölmənin digər xəbərləri
