“Heydər Əliyev və Azərbaycanda multikultural dəyərlər” mövzusunda konfrans keçirilib
Bakı, 22 oktyabr, AZƏRTAC
Azərbaycan Respublikasının İnsan Hüquqları üzrə Müvəkkilinin (Ombudsman) Şimal Regional Mərkəzinin, Quba-Xaçmaz Regional Gənclər və İdman İdarəsinin və Dini Qurumlarla İş üzrə Dövlət Komitəsinin Quba bölgəsi üzrə şöbəsinin birgə təşkilatçılığı ilə “Heydər Əliyev və Azərbaycanda multikultural dəyərlər” mövzusunda konfrans keçirilib.
Konfransda Quba-Xaçmaz Regional Gənclər və İdman İdarəsinin rəisi Nəcəf Novruzov, Ombudsmanın Şimal Regional Mərkəzinin rəhbəri Bəhruz Əfəndiyev, Dini Qurumlarla İş üzrə Dövlət Komitəsinin Quba bölgəsi üzrə şöbəsinin müdiri Ramin Xudayev, tələbələr və könüllülər iştirak ediblər.
Ombudsman Aparatından AZƏRTAC-a bildirilib ki, konfransda Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad olunub.
Çıxışlar zamanı Ulu Öndər Heydər Əliyevin bütün sahələrdə olduğu kimi, multikulturalizm sahəsində də gördüyü mühüm işlərin bu gün uğurla davam etdirilməsindən bəhs olunub. Ulu Öndərin Azərbaycan dövlətçiliyinin yüksəlişini şərtləndirən və multikulturalizmin əsas bazası olan Azərbaycançılıq prinsipini milli ideologiya kimi irəli sürdüyü qeyd edilib.
Tədbirin yekununda iştirakçıları maraqlandıran suallar cavablandırılıb.
Bölmənin digər xəbərləri
