SİYASƏT
HEYDƏR ƏLİYEVİN HAKİMİYYƏTƏ QAYIDIŞI XALQIMIZI FACİƏLƏRDƏN, AZƏRBAYCAN DÖVLƏTÇİLİYİNİ MƏHV OLMAQDAN XİLAS ETDİ
AZƏRTAC xəbər verir ki, 15 İyun - Milli Qurtuluş günü münasibətilə iyunun 13-də Binəqədi Rayon İcra Hakimiyyətində rayon ictimaiyyəti nümayəndələrinin toplantısı keçirilmişdir.
Toplantı iştirakçıları əvvəlcə rayon icra hakimiyyətinin binası qarşısında ümummilli lider Heydər Əliyevin abidəsi önünə tər güllər düzmüş, ulu öndərin xatirəsini ehtiramla anmışlar.
İcra hakimiyyətinin başçısı Alı Qocayev bayram münasibətilə iştirakçıları təbrik etmişdir. Bildirmişdir ki, Milli Qurtuluş günü olmasaydı, təntənəli surətdə qeyd etdiyimiz digər bayramlar da olmazdı. Çünki məhz həmin gün hakimiyyətə qayıdan ulu öndər Heydər Əliyev Azərbaycan dövlətçiliyini məhv olmaqdan, xalqımızı faciələrdən, qardaş qırğını və parçalanmadan xilas etdi.
Toplantıda Milli Məclisin aqrar siyasət daimi komissiyasının sədri Eldar İbrahimov Milli Qurtuluş gününün siyasi əhəmiyyətinə dair məruzə ilə çıxış etmişdir. E.İbrahimov bildirmişdir ki, 1993-cü il iyunun 15-də tanrı özü Heydər Əliyevi bir xilaskar kimi Azərbaycan xalqına göndərmişdir. Milyon ildən artıq yaşı olan Azərbaycan xalqının dövlətçilik tarixində ulu öndər Heydər Əliyevin müqayisəedilməz şəxsiyyət olduğunu vurğulayan natiq demişdir ki, müasir Azərbaycan dövlətinin yaradılması məhz Heydər Əliyevin adı ilə bağlıdır.
Hələ sovet hakimiyyəti dövründə Azərbaycan KP MK-nın birinci katibi olarkən Heydər Əliyevin müstəqilliyin təməlini həm iqtisadi, həm hərbi, həm də kadr hazırlığı və digər sahələrdə atdığı addımlarla qoyduğunu qeyd edən E.İbrahimov 1990-cı ilin yanvar faciəsindən sonra onun xalqımızın müdafiəsinə qalxaraq heç nədən çəkinmədən SSRİ rəhbərliyini kəskin şəkildə ittiham etməsini xatırlatmışdır.
Toplantıda çıxış edən Azərbaycan Beynəlxalq Universitetinin prorektoru, professor Həsən Bayramov və başqaları bildirmişlər ki, XX əsrin sonlarında, xüsusilə SSRİ-nin dağılması ərəfəsində və müstəqilliyimizin ilk illərində xalqımızın başına açılan müsibətlərin səbəbi məhz rəhbərimizin olmamasından irəli gəlmişdir. Əgər Heydər Əliyev Dağlıq Qarabağ münaqişəsi başlayan zaman hakimiyyət başında dayansaydı, nə torpaqlarımız işğal ediləcəkdi, nə də 1 milyon məcburi köçkün və qaçqınımız olacaqdı.
Vurğulanmışdır ki, hakimiyyətə qayıtdıqdan sonra həyata keçirdiyi islahatlar, yeritdiyi siyasət nəticəsində Azərbaycanı bütün dünyaya tanıdan ümummilli lider xalqımızın öz seçimində yanılmadığını sübut etdi. Sevindirici haldır ki, dahi öndərin əsasını qoyduğu islahatlar və ideyalar bu gün Prezident İlham Əliyev tərəfindən uğurla həyata keçirilir, Azərbaycan xalqı onun rəhbərliyi altında xoşbəxt gələcəyə doğru qətiyyətlə addımlayır.