Hikmət Babaoğlu: Azərbaycan dünya siyasətinin cazibə mərkəzlərindən birinə çevrilməkdədir
Bakı, 10 mart, AZƏRTAC
Azərbaycan həyata keçirdiyi dərin strateji diplomatiya sayəsində dünya siyasətinin cazibə mərkəzlərindən birinə çevrilməkdədir. Bunun əsas səbəblərindən biri Prezident İlham Əliyevin dünya siyasətində baş verənlər qlobal dəyişikləri düzgün qiymətləndirmək və bu kontekstdə mili təhlükəsizliyimizi, milli maraqlarımızı yeni çağırışlarla uzlaşdıra bilmək bacarığıdır.
Bu fikirləri AZƏRTAC-a açıqlamasında Milli Məclisin deputatı Hikmət Babaoğlu bildirib.
Onun sözlərinə görə, bu gün Azərbaycan yerləşdiyi mürəkkəb coğrafiyanı həyata keçirdiyi mühüm enerji və nəqliyyat layihələri ilə mühüm tərəfdaşlıq məkanına çevirməyi bacarıb. Azərbaycan Çindən Londona qədər uzanan Böyük İpək yolunun orta xəttini “Bir kəmər, bir yol” layihəsi çərçivəsində reallığa çevirib. Həmçinin Cənubi Qafqazda beynəlxalq hüququn tələblərini yerinə yetirərək ərazi bütövlüyünü təmin edib və uzunmüddətli sülh üçün olduqca əlverişli perspektiv yaradıb. Ölkəmiz Avrasiya inteqrasiya məkanının mühüm həlqələrindən birinə çevrilib. Bütün bunlar şübhəsiz ki, həm avropalı, həm də asiyalı tərəfdaşlarımızın diqqətini cəlb edir.
H.Babaoğlu diqqətə çatdırıb ki, hazırda Azərbaycanın ən böyük ticarət tərəfdaşı Avropa İttifaqı ölkələridir. Ancaq buna paralel olaraq ikitərəfli münasibətlərdə də ticari tərəfdaşlıq mühüm əhəmiyyət kəsb edir. Bu günlərdə Böyük Britaniya Baş nazirinin Azərbaycan üzrə ticarət elçisi Baronessa Emma Nikolsonun ölkəmizə səfəri, İtaliya Nazirlər Şurasının Sədri Mario Draqinin Prezident İlham Əliyevə zəngi hazırkı mürəkkəb geosiyasi şərtlər daxilində Azərbaycanın etibarlı tərəfdaş olduğunun göstəricisidir. Ancaq yeni dünya düzəninin formalaşdığı hazırkı tarixi mərhələdə məsələ sadəcə, iqtisadiyyat məsələsi deyil, həm də çoxqütblü dünya nizamında milli dövlətlərin yeri, rolu və gələcəyi məsələsidir.
Deputat vurğulayıb ki, bu mühüm proseslərdə Azərbaycan Prezidenti İlham Əliyevin tutduğu mövqe və geostrateji proseslərdə oynadığı rol regionumuz üçün açar mahiyyəti daşıyır. Dövlətimizin başçısı müxtəlif qütblərdə dayanan dövlətlərin liderləri ilə ən mürəkkəb məsələləri müzakirə etməklə ən optimal tərəfdaşlıq platformaları təklif edə bilir. Ona görə də bu gün faktiki olaraq müharibə edən ölkələrin də, bu müharibə kontekstində müxtəlif qütblərdə dayanan ölkələrin liderləri də vaxtaşırı Azərbaycan Prezidenti İlham Əliyevlə dialoq çərçivəsində ən müxtəlif məsələləri müzakirə edirlər. Bu, Azərbaycan Prezidentinin əsl liderlik keyfiyyətləri və beynəlxalq aləmdə xüsusi nüfuz sahibi olması ilə əlaqədardır.
Bölmənin digər xəbərləri
