İCTİMAİ TELEVİZİYA VƏ RADİO YAYIMLARI ŞİRKƏTİNİN BAŞ DİREKTORU İSMAYIL ÖMƏROVUN ÇIXIŞI
-Möhtərəm cənab Prezident!
Hörmətli xanımlar və cənablar!
Əziz dostlar!
Bu gün suveren Azərbaycan Respublikasının tarixində ən yaddaqalan, unudulmaz günlərdən biridir.
İctimai teleradionun efirə çıxıb verilişlərini yayımlamağa başlaması, mən deyərdim ki, 2005-ci ilin 29 avqust gününü tarixiləşdirən ən mühüm hadisədir. Bu, adi bir təşkilatın, adi bir şirkətin doğum günü deyil, neçə illərdir çox gərgin müzakirələrin baş mövzusu olan, mən deyərdim, az qala ümumxalq müzakirəsindən düşməyən, xalqımızın həsrətlə, bəzən inadkarlıqla gözlədiyi şəffaf, demokratik qurumun yaranma günüdür. Yəqin hamınız mənimlə razılaşarsınız ki, bizim mətbuat sarıdan, elektron kütləvi informasiya vasitələri sarıdan korluğumuz yoxdur. Kifayət qədər kanallarımız da var, mətbuat orqanlarımız, qəzetlərimiz də var. Amma gəlin, etiraf edək ki, hələ də azad sözə, qərəzsiz, tərəfsiz informasiyaya ehtiyac böyükdür. Elə ona görə də hesab edirik ki, ictimai teleradionun Azərbaycanın efir məkanında yeri dar olmayacaqdır. Əksinə, bu boşluqları doldurmağa böyük ehtiyac var. İctimai teleradio bu ehtiyacdan yarandı.
Mən şirkətin yaranma tarixindən çox danışıb vaxtınızı almaq istəmirəm. Çünki bu, həm uzun, həm də çox qısa bir yoldur. Uzundur ona görə ki, bu, cəmiyyətdə neçə illərdir müzakirə edilən əsas mövzulardan biri idi. Qısadır ona görə ki, bu şirkəti sıfırdan yaratmaq, fəaliyyətə başlamaq üçün bizə cəmi 3 ay vaxt verildi. Hamı bilirdi ki, bu, mümkün deyildir. Çünki dünyanın heç bir ölkəsində 3 ay ərzində teleşirkət yaradılmayıbdır. Televiziya və radionun o qədər mürəkkəb, özünəməxsus xüsusiyyətləri var ki, həqiqətən, nəyəsə nail olmaq üçün gərək burada həm yaradıcılıq işlərini, həm təsərrüfat - texniki işləri yüksək səviyyədə qura biləsən.
Təvazökarlıqdan uzaq olsun, amma deyirəm ki, biz bunu bacardıq, çox böyük, məsuliyyətli işi yüksək səviyyədə yerinə yetirdik. Baxmayaraq ki, həm rəsmi, - mən açıq demək istəyirəm, - həm də qeyri-rəsmi dairələrdən bizə basqılar, təzyiqlər az olmadı. Amma ictimai televiziyanı yaratmaq haqqında xalqımızın istəyi, məhəbbəti, inadkarlığı hər şeyə qalib gəldi. Həmin qüvvələr aciz və pərişan qaldılar.
Mən dəfələrlə öz müsahibələrimdə demişəm və bu gün bir daha təkrar edirəm: İctimai teleradionun yaranmasında ən böyük qayğıkeş, onun ən böyük təəssübkeşi, ən böyük himayədarı cənab Prezidentimizdir. Buna görə, bütün kollektivimiz adından ona dərin təşəkkürümüzü bildirirəm.
Burada gördüyünüz bu tikinti-abadlıq işləri çox qısa zamanda görülmüşdür. Amma bu, məsələnin bir tərəfidir. Əgər biz yüksək səviyyəli, dərin məzmunlu, müasir tələblərə cavab verən, formatı ilə seçilən verilişlər hazırlamasaq, gördüyünüz bu quruculuq işlərinin, bizim müasir texnikanın heç bir dəyəri yoxdur. Təbii ki, ona görə də biz televiziyamızı müasir dünyanın ən yüksək standartları səviyyəsində qurmalıyıq.
Mən bu gün bir daha bəyan edirəm ki, ictimai televiziya Azərbaycan həqiqətlərini yayan, şəffaf, qərəzsiz və tərəfsiz, obyektiv informasiya yayan televiziya olacaqdır. Deyirlər, televiziya dünyaya açılan pəncərədir. Bu pəncərədən Azərbaycan həqiqətləri, Azərbaycan xalqının tarixı, milli mücadiləsi, xalqımızın ölməz musiqisi, ədəbiyyatı, onun böyük ənənəsi məhz ictimai teleradiodan daha aydın nümayiş etdiriləcək, səslənəcəkdir. Dünya Azərbaycan xalqının qüdrətini, böyüklüyünü məhz bu televiziyada daha aydın şəkildə görə biləcəkdir.
Biz hadisələri, sadəcə, naturalistcəsinə efirə köçürməyəcəyik. Bəli, biz çalışacağıq ki, bu və ya digər hadisələri tamaşaçılara operativ çatdıraq. Amma bizim bütün məqsədimiz, amalımız bundan ibarətdir ki, tamaşaçıları məhz dəyərli, keyfiyyətli verilişlərimizlə sevindirək, əyləndirək və hətta onları heyrətləndirməyi də bacaraq. Əlbəttə, biz sadəcə, seyrici rolunda olub, hadisələri efirə köçürməklə vəzifəmizi bitmiş hesab etmirik. Biz hesab edirik ki, bu, məsələnin bir tərəfidir, fəaliyyətimizin bir qolu ola bilər. Gələcəkdə biz Azərbaycanda milli həmrəyliyin, milli birliyin, vətəndaş cəmiyyətinin yaranmasında ən qüdrətli, şəffaf, ən demokratik bir təsisat rolunu oynamaq istəyirik. İnşaallah, belə də olacaqdır.
Diqqətinizə görə sağ olun, ürəkdən minnətdaram.
X X X
Azərbaycan Prezidenti İlham Əliyev mərasimdə nitq söylədi. (Dövlətimizin başçısının nitqi qəzetin bugünkü nömrəsinin birinci səhifəsində dərc edilir).
X X X
Sonra şirkətin bayrağı qaldırıldı, səhnəyə ictimai televiziyanın rəmzi pultu gətirildi. Azərbaycan Prezidenti pultu işə saldı. Bakı vaxtı ilə saat 18.00-da ölkəmizin televiziya məkanında yeni bir teleşirkət fəaliyyətə başladı.
Dövlətimizin başçısı tədbir iştirakçıları ilə səmimi söhbət etdi və incəsənət ustalarının konsertinə baxdı.
Bölmənin digər xəbərləri
