İDMANÇILARIMIZ BEYNƏLXALQ YARIŞDA UĞUR QAZANMIŞLAR
AZƏRTAC xəbər verir ki,Yunanıstanın Kavala şəhərində pauerliftinq üzrə növbəti Avropa çempionatı başa çatmışdır.
Turnirdə ölkəmizi Azərbaycanın pauerliftinq üzrə yığma komandasının baş məşqçisi Vaqif Müsəddiqin rəhbərliyi ilə Neftçi İdman-Sağlamlıq Mərkəzinin idmançıları - Məhərrəm Əliyev, Mehman Ramazanzadə, Elşən Hüseynov və Elnur Əlizadə təmsil etmişlər.
İlk dəfə belə bir nüfuzlu beynəlxalq yarışda iştirak edən Elşən Hüseynov (90 kq-dək) 180 kiloqram ağırlıq qaldıraraq turnirin bürünc medalçısı olmuşdur.
Digər idmançımız Elnur Əlizadə (56 kq-dək) 130 kiloqramla dördüncü yerlə kifayətlənmişdir.
Yarışlarda qüvvəsini sınayan 2001-ci ildə Avropa çempionu adını qazanmış Mehman Ramazanzadə (100 kq-dək) qaldırdığı 180 kiloqram nəticə ilə çempionatı dördüncü yerdə başa vurmuşdur.
Pauerliftinqçilərimizdən Məhərrəm Əliyev isə (100 kq-dan yuxarı) 197,5 kiloqram nəticə göstərərək bu turnirdə beşinci yeri tutmuşdur.
İdmançılarımızın bu çempionatda göstərdikləri nəticələrin 2008-ci il XIII Pekin Yay Paralimpiya Oyunlarına lisenziya qazanmaq üçün kifayət edib-etməməsi 2008-ci il yanvarın 31-dək elan ediləcəkdir.
Hazırda idmanın atletika növü üzrə 4 idmançımız XIII Pekin Yay Paralimpiya Oyunlarında iştirak etmək üçün lisenziya əldə etmişdir.
Qarşıda paralimpiyaçılarımızı daha mötəbər yarışlar gözləyir.
Bölmənin digər xəbərləri
