İKİ NƏFƏRİN ÖLÜMÜNƏ SƏBƏB OLMUŞ “ŞEYTAN TƏKƏRİ”NİN NƏZARƏTÇİSİ BARƏDƏ HƏBS QƏTİMKAN TƏDBİRİ SEÇİLMİŞDİR
Müvafiq tibbi yardım göstərilməsinə baxmayaraq, aldıqları xəsarət nəticəsində Xumar Əlizadə həmin gün, Nəzrin Əlizadə isə mayın 21-də üzərində cərrahiyyə əməliyyatı aparılarkən ölmüşlər.
Həmin faktla əlaqədar mayın 19-da Səbail Rayon Prokurorluğu tərəfindən ehtiyatsızlıqdan insan ölümünə səbəb olan əmək mühafizəsi və texniki təhlükəsizlik qaydalarını pozmağa görə cinayət məsuliyyəti nəzərdə tutan Azərbaycan Respublikası CM-in 162.2-ci maddəsi ilə cinayət işi başlanılmışdır.
Baş vermiş hadisə ilə əlaqədar təxirəsalınmaz istintaq tədbirləri həyata keçirilərək hadisə yeri və mütəxəsisslərin iştirakı ilə “Şeytan təkəri” attarksionuna baxış keçirilmiş, attraksionun fəaliyyətinə dair zəruri sənədlər götürülmüş, ölümün səbəbini müəyyən edilməsi üçün məhkəmə-tibbi və məhkəmə-bioloji ekspertizaları təyin edilmiş, hadisənin şahidləri dindirilmişlər.
Müəyyən edilmişdir ki, “Dənizkənarı Milli Parkın ərazisində fəaliyyət göstərən attraksionlardan istifadə qaydaları haqqında Təlimat”ın yüksək sürətlə hərəkət edən attraksionlarda 12 yaşa qədər uşaqların istifadə etməsinin qadağan olunmasına dair tələbi nəzarətçi Millət Quliyev tərəfindən pozularaq, Xumar Əlizadəyə azyaşlı uşağı ilə attraksiona daxil olmasına heç bir məhdudiyyət qoyulmamışdır.
Bununla əlaqədar “Şeytan təkəri” attraksionunda nəzarətçi işləyən Quliyev Millət İsa oğlu mayın 24-də ehtiyatsızlıqdan insan ölümünə səbəb olan əmək mühafizəsi və texniki təhlükəsizlik qaydalarını pozmağa görə məsuliyyət nəzərdə tutan Azərbaycan Respublikası CM-in 162.2-ci maddəsi ilə təqsirləndirilən şəxs qismində cəlb edilmiş və barəsində Səbail Rayon Məhkəməsi tərəfindən həbs qətimkan tədbiri seçilmişdir.
İstintaq zamanı hadisənin əmək mühafizəsi və texniki təhlükəsizlik qaydalarını pozma nəticəsində baş verdiyi sübuta yetirilməsinə baxmayaraq, son günlər bəzi kütləvi informasiya vasitələrində dənizkənarı Milli Parkda gənc ananın intihar edərək özünü və azyaşlı uşağını öldürməsi barədə faktlara əsaslanmayan ziddiyyətli məlumatlar yayılmışdır.
“Prokurorluq haqqında” Azərbaycan Respublikası Qanununun 22-ci maddəsinə müvafiq olaraq, Bakı şəhəri ərazisindəki parklarda və digər istirahət mərkəzlərində fəaliyyət göstərən attraksionlarda texniki təhlükəsizlik qaydalarına riayət olunmasına nəzarətin gücləndirilməsi, bu sahədə baş vermiş qanun pozuntularının, onları doğuran səbəb və şəraitin aradan qaldırılmasına dair Azərbaycan Respublikasının baş prokuroru Zakir Qaralov tərəfindən Bakı Şəhər İcra Hakimiyyətinə təqdimat göndərilmişdir.
Hazırda cinayət işi üzrə ibtidai istintaq davam edir.
