“İKİ SAHİL”İN NÖVBƏTİ XÜSUSİ BURAXILIŞI
“ƏSRİN MÜQAVİLƏSİ”NİN 10 İLLİYİNƏ HƏSR OLUNUR
Yüksək zövqlə tərtib və çap olunmuş xüsusi buraxılışda ümummilli liderimiz Heydər Əliyevin və Azərbaycan Prezidenti İlham Əliyevin yeni neft strategiyasının həyata keçirilməsi ilə bağlı apardığı çoxsaylı danışıqlar, keçirdiyi görüşlər və iştirak etdiyi tədbirlər fotoşəkillərdə öz əksini tapıb. Dövlət Neft Şirkətinin prezidenti Natiq Əliyevin, birinci vitse-prezident Xoşbəxt Yusifzadənin və şirkətin digər struktur rəhbərlərinin yazılarında neft sənayemizin tarixi, inkişaf mərhələləri, xüsusilə son 10 ildə bu sahədə görülən işlər konkret faktlarla oxucuya çatdırılır. Qeyd olunur ki, ölkəmizdə neft sənayesi böyük bir tarixə malik olsa da, onun tərəqqisi ümummilli liderimiz Heydər Əliyevin adı ilə bağlıdır. Çünki yeni neft strategiyasına uyğun olaraq 10 il əvvəl “Əsrin müqaviləsi”nin imzalanması ilə “qara qızıl”ın taleyi xalqımızın mənafeyi naminə həllini tapıb.
“Əsrin müqaviləsi” çərçivəsində görülən işlərin real mənzərəsinə çevrilən xüsusi buraxılışda ABŞ Prezidenti Corc Buşun, vitse-prezident Ricard Çeyninin, sabiq prezident Bill Klintonun, energetika naziri Spenser Abrahmın, Türkiyənin sabiq Prezidenti Süleyman Dəmirəlin, Gürcüstanın eks və indiki prezidentləri Eduard Şevardnadze və Mixail Saakaşvilinin, Böyük Britaniyanın baş naziri Toni Bleyerin və başqa dövlət və şirkət rəhbərlərinin ölkəmizdə həyata keçirilən yeni neft strategiyası ilə bağlı fikirlərinə geniş yer verilib. Neft sənayemizin tarixi, Nobel mükafatının təsis edilməsinə onun təsiri, “Bakı-Tbilisi-Ceyhan: üç dəniz əfsanəsi”nin reallığa çevrilməsi, respublikamızın nəinki iqtisadi, o cümlədən siyasi və diplomatik həyatında rolu, dünya iqtisadiyyatına inteqrasiyası, neftçilərin sosial vəziyyəti barədə də burada geniş məlumatlarla tanış olmaq mümkündür. Bütün yazılarda qazanılan hər bir uğur ümummilli liderimiz Heydər Əliyevin müdrikcəsinə müəyyənləşdirdiyi və uğurla həyata keçirilməsinin təməlini qoyduğu yeni neft strategiyasının məntiqi nəticəsi kimi dəyərləndirilir, bu kursun respublikamızın Prezidenti İlham Əliyev tərəfindən müvəffəqiyyətlə davam etdirilməsi qürur hissi ilə vurğulanır.
Bölmənin digər xəbərləri
