İKİ YÜZDƏN ÇOX ZAQATALALI MƏZUN TƏLƏBƏ ADI QAZANMIŞDIR

14.09.2006 [12:02]
Çap et
A⁺ A^-

AZƏRTAC-ın müxbiri xəbər verir ki, bu il orta məktəbi bitirən 959 nəfər zaqatalalı məzun ali məktəblərə qəbul imtahanlarında iştirak etmiş və 200 nəfərdən çoxu tələbə adını qazanmışdır. Onların 3 nəfəri 600, 23 nəfəri isə 500-dən çox bal toplamışdır.

Rayon mədəniyyət evində ali məktəblərə qəbul olunmuş tələbələrlə ictimaiyyətin nümayəndələrinin görüşü olmuşdur. Tədbiri giriş sözü ilə açan Zaqatala rayon icra hakimiyyətinin başçısı Asif Əsgərov tələbələri bu yüksək ada layiq görülmələri münasibətilə təbrik etmiş, ölkəmizdə təhsil, səhiyyə, mədəniyyət və digər sahələrin inkişafı ilə bağlı həyata keçirilən geniş proqram və layihələrdən söhbət açmışdır.

Çıxışlarda vurğulanmışdır ki, respublikamızda təhsilin səviyyəsi ildən-ilə yüksəlir. Ümummilli liderimiz Heydər Əliyevin təşəbbüsü ilə başlanılan təhsil islahatları bu gün də uğurla davam etdirilir.

Təbrik və çıxışlardan sonra qəbul imtahanlarında yüksək bal toplamış məzunlara hədiyyələr təqdim olunmuşdur.

Mərasim mədəniyyət işçilərinin hazırladığı rəngarəng konsert proqramı ilə başa çatmışdır.