İLK QADIN XALQ YAZIÇISININ YUBİLEYİ
Martın 12-də Bakı Dövlət Universitetində Azərbaycan ədəbiyyatının görkəmli nümayəndəsi, xalq yazıçısı, filologiya elmləri doktoru, professor Əzizə Cəfərzadənin anadan olmasının 80 illiyinə həsr edilmiş təntənəli yığıncaq keçirilmişdir.
BDU-nun rektoru, Azərbaycan MEA-nın müxbir üzvü Abel Məhərrəmov yığıncağı açaraq, xalqımızın yüzillər boyunca təşəkkül tapmış yüksək milli-mənəvi dəyərlərinin qorunub saxlanmasında yazıçının yaradıcılığının mühüm rol oynamasından, tariximizin ayrı-ayrı mərhələlərindən bəhs edən əsərlərinin gənc nəslin vətənpərvərlik ruhunda tərbiyəsinə xidmət etməsindən danışdı. Rektor bildirdi ki, milli ədəbiyyatımızın inkişafındakı xidmətlərinə görə qadın naşirlərimiz içərisində ilk dəfə olaraq Əzizə Cəfərzadəyə Azərbaycan Prezidentinin Fərmanı ilə “Xalq yazıçısı” fəxri adı verilmişdir.
BDU-nun filologiya fakültəsinin dekan müavini, professor Tofiq Hüseynoğlu yubilyarın ədəbi-ictimai və elmi-pedaqoji fəaliyyəti barədə məruzə etdi.
Yazıçılar Birliyinin sədri, xalq yazıçısı, Milli Məclisin deputatı Anar, təhsil naziri Misir Mərdanov, Yasamal rayon icra hakimiyyətinin başçısı Azər Əliyev, Dünya Azərbaycanlılarının Əlaqələndirmə Şurasının üzvü, Böyük Britaniyanın Edinburq Universitetinin professoru Qulamrza Cəmşidi, xalq artisti, professor Lütfiyar İmanov, BDU-nun filologiya fakültəsinin dekan əvəzi Məhəmməd Məmmədov, türkoloqiya kafedrasının müdiri, MEA-nın müxbir üzvü Tofiq Hacıyev və başqaları yığıncaqda çıxış etdilər.
Natiqlər vurğuladılar ki, yazıçının 60 ildən artıq bir dövrü əhatə edən yaradıcılığı, qəhrəmanlıqla dolu keçmişə ehtiram aşılayan tarixi romanları milli dilimizin saflığının və təmizliyinin qorunması yolunda mübarizə timsalına çevrilərək, xalqımızı əsrlərin sınağından çıxmış adət-ənənələrimizə sadiq qalmağa, bu müqəddəs sərvəti ulu əcdadlarımızın adına layiq yaşatmağa çağırır. Əzizə xanım həm də milli mədəniyyətimizin böyük xəzinəsi olan zəngin şifahi ədəbi irsimizin yorulmaz tədqiqatçısı, mahir pedaqoq kimi tanınır.
Yığıncaqda yubilyara ona ünvanlanmış çoxsaylı təbriklər oxundu, fəxri fərman, qiymətli hədiyyə və gül-çiçək dəstələri təqdim edildi.
Xalq yazıçısı, professor Əzizə Cəfərzadə çıxış edərək, yaradıcılığını yüksək qiymətləndirdiklərinə görə Azərbaycan Prezidenti Heydər Əliyevə, yığıncaq iştirakçılarına dərin minnətdarlığını bildirdi.
Bölmənin digər xəbərləri
