İlqar Orucov: Azərbaycan və Türkiyə qardaşlığının təntənəsini dünyaya sübut edirik
Bakı, 11 fevral, AZƏRTAC
Türkiyədə baş vermiş zəlzələ bu gün hər bir azərbaycanlının ürəyində böyük bir nisgil yaradıb. Dünyanın harasında yaşamasından asılı olmayaraq azərbaycanlılar bunu öz faciəsi kimi qəbul edirlər. Prezident İlham Əliyev, Birinci vitse-prezident Mehriban Əliyeva bu dəhşətli zəlzələnin ilk günündən həm dövlətimizin qardaş ölkəyə qayğısı, həm də bir insanlıq nümunəsi olaraq müvafiq işlər görürlər. Dövlətimizin başçısı faciənin ilk anlarından Türkiyə Prezidentinə zəng edərək başsağlığı verdi. Prezident İlham Əliyevin Türkiyənin Azərbaycandakı səfirliyinə gedərək səfirə və eyni zamanda, bütün Türkiyə xalqına başsağlığı verməsi, öz ürək sözlərini orada ifadə etməsi hər bir azərbaycanlının ürəyindən gələn sözlər idi.
Bu fikirləri AZƏRTAC-a açıqlamasında Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü, Azərbaycan Gənc Alim, Doktorant və Magistrlər Cəmiyyətinin sədri İlqar Orucov deyib. O qeyd edib ki, Azərbaycan Türkiyəyə ilk yardım edən ölkə kimi bu gün də dəstəyini davam etdirir: “Eyni zamanda, Birinci vitse-prezident, Heydər Əliyev Fondunun prezidenti Mehriban Əliyevanın bu məqamda gördüyü böyük işlər diqqətçəkəndir. Mehriban xanım Əliyevanın tapşırığı ilə Heydər Əliyev Fondu bütün imkanlarını səfərbər edərək yardım göstərdi, prosesə könüllülər cəlb edildi. Bu, həm də Fondun humanist dəyərlərə sadiqliyinin növbəti nümayişidir. Bu addımlar Türkiyə tərəfindən çox yüksək qiymətləndirilir. Bu, bir daha onu göstərir ki, bir millət, iki dövlət olan Azərbaycan və Türkiyənin sevinci də, kədəri də birdir.
Bu proseslərdə xalqımız da dövlətimizin ətrafında səfərbər olub. Bu, çox qürurvericidir. Ən ucqar kəndlərdən belə qardaş yardımı göndərilir. Bu, insanların içindən gələn bir yardımlaşmadır, çətin günündə qardaşının yanında olmasının göstəricisidir.
Əlbəttə ki, zəlzələnin fəsadları aradan qalxana qədər dövlətimiz, xalqımız bu yardımları davam etdirəcək. Cəmiyyətin elə bir təbəqəsi yoxdur ki, bu prosesdən kənarda qalsın. Vətəndaş cəmiyyəti strukturları, qeyri-hökumət təşkilatları, bütün idarələr, müəssisələr və sadə insanlar bu prosesdə öz qardaşlarının, bacılarının yanındadırlar. Hesab edirəm ki, bu, həm də Azərbaycan xalqının içindən gələn bir insanlıq nümunəsidir. Dünyada elə bir dövlət yoxdur ki, bu qədər öz qardaş dövlətinin yanında olsun. Yəni biz dünyada buna bənzər zəlzələlər, faciələr görmüşük. Bir neçə il bundan əvvəl Yaponiyada böyük bir zəlzələ və onun ardınca sunami nəticəsində insanlar həlak olmuşdu. Yaponiya kimi güclü iqtisadiyyata malik bir dövlət çox çətin duruma düşmüşdü. O zaman və yaxud fərqli ölkələrdə baş verən bu cür analoji faciələr zamanı iki qardaş dövlətin bir-birinə bu qədər sıx bağlı olduğunu göstərən bu cür yardımlaşmanı digər dövlətlərdə görməmişik”.
İlqar Orucovun fikrincə, ölkəmizin qardaş dövlətə dəstəyi Azərbaycan və Türkiyənin dostluğunun, qardaşlığının əbədi olduğunu bir daha göstərdi: “Bu dövlətlər öz liderlərinin timsalında bu qardaşlığı hər zaman izhar ediblər. Azərbaycanın çətin günlərində, torpaqlarımızın işğal altında olduğu dövrdə biz Türkiyənin bu dəstəyini görmüşdük. 44 günlük Vətən müharibəsində Türkiyənin bütün sahələrdə dəstəyini hiss etdik. Biz Azərbaycan və Türkiyə qardaşlığının təntənəsini dünyaya sübut etdik və edirik. Əminəm ki, böyük türk xalqı bu çətin anları geridə qoyacaq və yenidən o şəhərlər, kəndlər, dağılmış evlər bərpa olunacaq, insanlar yenidən öz yaşamına qayıdacaqlar. Bu proseslərdə Azərbaycan dövləti hər zaman qardaş Türkiyənin yanında olacaq. Xalqımıza xas olan dəyərlər var, o çətin vaxtda yardımlaşmaq böyük ürəyə sahib olmağı göstərir. Azərbaycanın hər bir vətəndaşı son tikəsini belə bu gündə öz qardaşı ilə paylaşır. Yardımda hər hansı bir formada payı olmasını istəyir. Azərbaycan xalqının bu cür bəşəri dəyərlərə sadiqliyi ilə vətəndaş olaraq qürur duyuram. Biz bu məqamda insanlığımızla bərabər dosta, qardaşa nə qədər bağlı olduğumuzu bir daha bütün dünyaya bəyan etdik”.
Bölmənin digər xəbərləri
