İDMAN
İlqar Rəhimov: Əsas məqsədimiz növbəti Yay Paralimpiya Oyunlarına daha böyük heyətlə qatılmaqdır
Bakı, 15 may, AZƏRTAC
Azərbaycan Milli Paralimpiya Komitəsinin (AMPK) prezidenti İlqar Rəhimov Almaniyanın Hannover şəhərində keçirilmiş beynəlxalq turnirdə iştirak etmiş güllə atıcılığı üzrə milli komandamızın üzvləri ilə görüşüb.
AZƏRTAC AMPK-ya istinadla xəbər verir ki, görüşdə komitənin icraçı direktoru Eldar Babayev, prezidentin köməkçisi-idman şöbəsinin müdiri Kamal Məmmədov, milli komandanın baş məşqçisi Əfqan Əhmədov və komandanın digər üzvləri iştirak ediblər.
Komitə prezidenti İlqar Rəhimov beynəlxalq turnirdə uğurla iştirak edərək dünya çempionatına lisenziya əldə etmiş idmançıları təbrik edib. Komitə prezidenti sentyabrın 17-29-da Perunun paytaxtı Limada keçiriləcək dünya çempionatına hazırlıqla bağlı baş məşqçiyə müvafiq tapşırıqlar verib və komanda üzvlərinə uğurlar arzulayıb.
İlqar Rəhimov bildirib ki, məqsəd növbəti Yay Paralimpiya Oyunlarına daha böyük heyətlə qatılıb ölkəmizi layiqincə təmsil etməkdir.
Güllə atıcılığı üzrə milli komandanın baş məşqçisi Ə.Əhmədov öz növbəsində komandanın hazırkı fiziki və psixoloji vəziyyəti barədə məlumat verərək bildirib ki, idmançılar hazırda qarşıdan gələn dünya çempionatına hazırlığı davam etdirirlər.
Qeyd edək ki, Almaniyanın Hannover şəhərində keçirilmiş beynəlxalq turnirdə millimiz 4 gümüş və 1 bürünc medal əldə edib.