“İmprotex İndustries”in “Revival” mexaniki minatəmizləyən texnikaları xarici bazarların diqqətini cəlb edib
Azərbaycanda “İmprotex İndustries” zavodunun istehsal etdiyi “Revival” mexaniki minatəmizləyən texnikaları xaricdə artan maraqla qarşılanır.
Bu istiqamətdə növbəti vacib addım Səudiyyə Ərəbistanı Krallığının Müdafiə Nazirliyi tərəfindən atılıb. Belə ki, Səudiyyə Ərəbistanının Müdafiə Nazirliyinin nümayəndə heyəti Azərbaycan Respublikası Müdafiə Sənayesi Nazirliyinin dəstəyi ilə ölkəmizə işgüzar səfər gerçəkləşdirib.
Səfər çərçivəsində “İmprotex” Şirkətlər qrupunun təmsilçiləri ilə görüşlər keçirilib. Görüşlər zamanı Səudiyyə Ərəbistanına “Revival” markalı texnikaların ixracı potensialı və minatəmizləmə sahəsində mümkün əməkdaşlıq istiqamətləri ətraflı müzakirə olunub.
Nümayəndə heyəti, həmçinin Azərbaycan Respublikasının Minatəmizləmə Agentliyinin rəsmiləri ilə görüş keçirib. Bu görüş çərçivəsində nümayəndə heyəti Qarabağa səfər edib, orada “Revival” texnikalarının real əməliyyat şəraitində sınaqdan keçmə prosesini izləyib. Bu texnikaların effektivliyi qonaqlar tərəfindən yüksək qiymətləndirilib.
Səfər çərçivəsində daha bir vacib görüş Azərbaycan Respublikası Müdafiə Nazirliyi ilə keçirilib. Görüşdə hər iki ölkə arasında hərbi sferada, xüsusilə mühəndis-texniki sahədə əməkdaşlıq perspektivləri dərindən müzakirə olunub.
Nümayəndə heyəti səfər çərçivəsində Azərbaycan Respublikası İqtisadiyyat Nazirliyi yanında İqtisadi Zonaların İnkişafı Agentliyində də görüş keçirib. Görüşdə iki ölkə arasında iqtisadi əlaqələrin gücləndirilməsi və Azərbaycanın müdafiə sənayesi məhsullarının Səudiyyə Ərəbistanı bazarına çıxarılması üzrə imkanların genişləndirilməsi müzakirə olunub.
Bundan əlavə, nümayəndə heyəti “Improtex industries” zavodu tərəfindən ilkin prototipi hazırlanıb və gələcəkdə davamlı istehsalına başlanacaq tam yerli istehsal olan İTX 6L, İTX 15M və İTX 20H model zirehli hərbi avtomobillərə baxış keçirib və onların perspektivi ilə tanış olub.
Görüş əsnasında “Improtex” şirkətlər qrupu ilə Səudiyyə Ərəbistan Krallığı arasında uzunmüddətli əlaqənin əsasları qoyulub. Bu səfər Azərbaycan və Səudiyyə Ərəbistanı arasında dərinləşən müdafiə, iqtisadiyyat və texnoloji əməkdaşlığın növbəti nümunəsidir.
Bölmənin digər xəbərləri
