İndira Hacıyeva: Şəhərlər sağlam, hamı üçün əlçatan olmalıdır
Bakı, 26 iyun, AZƏRTAC
Qarabağ və Şərqi Zəngəzurda yenidənqurma təkcə yolların və ya binaların bərpası demək deyil. Bu, həm də etimadın, imkanların və gündəlik həyatın yenidən qurulmasıdır. Bu gün Azərbaycan postmünaqişə ərazilərində 9 yeni şəhər və yüzlərlə yaşayış məntəqəsi salır — bu, hər bir icmanın təkcə bərpaya deyil, həm də çiçəklənmək şansına layiq olduğuna olan inamımızdan irəli gəlir.
AZƏRTAC xəbər verir ki, bunu Bakıda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 2024-2026-cı illər üzrə sədrliyi çərçivəsində keçirilən Gənclər Şurasının 9-cu iclasının açılışında çıxış edən gənclər və idman nazirinin müavini İndira Hacıyeva bildirib.
Onum sözlərinə görə, bu gün təxminən 85 000 insan bu canlandırılmış ərazilərdə yaşayır, işləyir və təhsil alır: “Şəhərlər sağlam, hamı üçün əlçatan olmalıdır. Məhz buna görə “Sağlam icmalar”, “İdman səhərləri” və “Fit Track” layihəsi kimi təşəbbüslər ictimai həyatı, hərəkəti və rifahı gənclərə daha da yaxınlaşdırır.
Çünki yaşamaq üçün əlverişli şəhər sadəcə insanların məskunlaşdığı şəhər deyil. Bu, insanların özlərini canlı hiss etdiyi şəhərdir. Biz innovasiyalara və modernləşməyə investisiya qoyarkən, eyni dərəcədə mühüm olan başqa bir şeyi də qəbul edirik: öz kimliyi olmayan şəhərlər zamanla ruhunu itirir. Buna görə də mədəni irsin qorunması, ənənələrin yaşadılması və sosial birliyin gücləndirilməsi davamlı şəhərsalma inkişafının ayrılmaz hissəsi olaraq qalır”,- deyə o qeyd edib.
Bölmənin digər xəbərləri
