İndiyədək "Coursera" təhsil proqramında 6654 azərbaycanlı qeydiyyatdan keçib
Bakı, 26 yanvar, AZƏRTAC
Bu günə kimi "Coursera" təhsil proqramında 6654 azərbaycanlı qeydiyyatdan keçib.
AZƏRTAC xəbər verir ki, bunu Dördüncü Sənaye İnqilabının Təhlili və Koordinasiya Mərkəzinin (4SİM) Fariz Cəfərov deyib.
O qeyd edib ki, bu rəqəmin 10 minə çatdırılması nəzərdə tutulur. Hazırda 1300 azərbaycanlı bu proqramı uğurla başa vurub.
Ötən il Dördüncü Sənaye İnqilabının Təhlili və Koordinasiyası Mərkəzi 4SI Akademiyası layihəsinə start verib. "Coursera" beynəlxalq tədris platformasında “4Sİ Akademiyası”nın iştirakçıları üçün süni intellekt, böyük verilənlər (Big Data), maşın öyrənməsi, blokçeyn və bulud texnologiyaları, həmçinin liderlik, kommunikasiya və ingilis dili bacarıqları da daxil olmaqla, ümumilikdə 89 subkateqoriya üzrə 800-ə yaxın kurs təqdim olunur.
Qeyd edək ki, “Coursera” hər kəsə istənilən yerdə aparıcı universitet və şirkətlərin onlayn kurslarına qoşulmaq imkanı yaradan beynəlxalq təhsil platformasıdır. 115 milyondan çox istifadəçisi olan platformada 5400-dən artıq kurs mövcuddur. “Coursera” 300-dən çox aparıcı universitet və şirkətlə tərəfdaşlıq edir.
Bölmənin digər xəbərləri
