İNDONEZİYA AZƏRBAYCAN İLƏ ƏLAQƏLƏRİ İNKİŞAF ETDİRMƏYƏ BÖYÜK ÖNƏM VERİR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, görüşdə nazir Elmar Məmmədyarov Azərbaycanın İndoneziya ilə əlaqələrin inkişafına önəm verdiyini qeyd edərək, bu münasibətlərin bundan sonra da qarşılıqlı faydalılıq əsasında davam etdirilməsinin vacibliyini vurğulamışdır.
Görüşə konkret təkliflərlə gəldiyini bildirən səfir Amin Rianom, ölkəsinin Azərbaycanla bir sıra sahələrdə əlaqələrin genişləndirilməsində maraqlı olduğunu bildirmişdir. Səfir ölkələrimiz arasında texniki-iqtisadi əlaqələrin, ikiqat vergiqoyma, enerji daşıyıcıları, həmçinin ağac və kağız məmulatı, elektronika sahələrində əməkdaşlığın genişləndirilməsinin və xarici siyasət idarələrinin qarşılıqlı məsləhətləşmələr aparmalarının İndoneziya üçün əhəmiyyət daşıdığını qeyd etmişdir. Azərbaycanın ixracat üçün əlverişli coğrafi mövqedə yerləşdiyini diqqətə çatdıran səfir, hər iki ölkə üçün maraq doğuran məsələlər barədə fikir mübadiləsi aparılmasının əhəmiyyətli olduğunu bildirmişdir.
Nazir Elmar Məmmədyarov İndoneziyanın digər sahələrdə də potensialının olduğunu qeyd edərək, həmin sahələr üzrə də əlaqələrin qurulması üçün birgə səylərin vacibliyini vurğulamışdır. Daha sonra xarici siyasət idarəsinin başçısı Ermənistan-Azərbaycan, Dağlıq Qarabağ münaqişəsi və onun sülh yolu həlli istiqamətində görülən işlə barədə səfirə ətraflı məlumat vermişdir.
Görüşdə qarşılıqlı maraq doğuran bir sıra məsələlər də müzakirə edilmişdir.
Bölmənin digər xəbərləri
