İqor Qrosu: Bu il Azərbaycanla Moldova planların reallaşdırılması üçün intensiv işləyib
Kişineu, 27 dekabr, AZƏRTAC
2023-cü il Azərbaycan və Moldova arasında əməkdaşlıq baxımından yaxşı il oldu. Biz ümumi planların və layihələrin reallaşdırılması üçün intensiv şəkildə işləmişik. 2022-ci ildən başlanan və yarımçıq qalan məsələlər üzərində çalışmışıq.
Bu barədə AZƏRTAC-a məxsusi açıqlamasında Moldova parlamentinin sədri İqor Qrosu bildirib.
O deyib ki, Azərbaycan və Moldova əməkdaşlığın gücləndirilməsi üçün bir-birilərinə dost kimi kömək edib və bu iş hazırda davam etdirilir.
“Enerji, infrastruktur, kənd təsərrüfatı və digər perspektivli sahələr üzrə birgə uğurlu işlər görülür. Eyni zamanda, Azərbaycan və Moldova prezidentləri arasında çox yaxşı qarşılıqlı və isti münasibətlər vardır. Biz bunu yüksək qiymətləndiririk”, - deyə İqor Qrosu əlavə edib.
Parlament sədri vurğulayıb ki, Moldovanın Avropa İttifaqına üzvlüklə bağlı danışıqlara başlanmasına dair qərar Azərbaycanla Moldova arasında əməkdaşlığın daha da güclənməsi istiqamətində potensialı artıracaq.
İqor Qrosu, həmçinin 2024-cü ilin iki ölkə arasında əməkdaşlıq baxımından daha yaxşı il olacağına inandığını vurğulayıb.
AZƏRTAC-ın xüsusi müxbiri
Kişineu
Bölmənin digər xəbərləri
