İQTİSADİ İNKİŞAF NAZİRLİYİ DÖVLƏT ƏMLAKININ ÖZƏLLƏŞDİRİLMƏSİ DEPARTAMENTİNİN MƏLUMATI
Dövlət əmlakının özəlləşdirilməsi departamenti tərəfindən birinci özəlləşdirmə proqramı çərçivəsində özəlləşdirilməsi başa çatdırılmamış, habelə ikinci dövlət proqramının həyata keçirilməsi ilə əlaqədar Azərbaycan Respublikası prezidentinin müvafiq fərman və sərəncamları ilə özəlləşdirilmək üçün açıq elan edilmiş yanacaq-energetika kompleksi, kimya, maşınqayırma, nəşriyyat və poliqrafiya, balıqçılıq, rabitə və hava nəqliyyatı müəssisələrinin özəlləşdirilməsi ilə bağlı hazırlıq tədbirləri həyata keçirilmiş, müəssisələrdə özəlləşdirmə komissiyalarının fəaliyyəti təşkil olunmuş və ötən il ərzində 212 müəssisənin açıq səhmdar cəmiyyətinə çevrilməsi təmin edilmişdir.
Bunlardan 114-ü Azərbaycan Respublikası prezidentinin 22 və 29 mart 2001-ci il tarixli müvafiq sərəncamları ilə özəlləşdirilmək üçün açıq elan edilmiş müəssisələrdir.
Eyni zamanda, səhmdar cəmiyyətlərinə cevrilmiş müəssisələrin təsis sənədlərinin Ədliyyə Nazirliyində, səhm buraxılışı və emissiya prospektlərinin isə Azərbaycan Respublikasının prezidenti yanında Qiymətli Kağızlar üzrə Dövlət Komitəsində qeydiyyatdan keçirilməsi təmin edilmişdir.
Bu müəssisələr sırasında “Azneftkimyamaş” Səhmdar Cəmiyyəti və onun tərkibinə daxil olan 18 törəmə səhmdar cəmiyyəti, “Azelektroterm”, “Azərbaycan qaz emalı”, “Bakı kondisioneri”, “Azərelektroişıq”, “Bakı elektroavtomat”, “Biyan”, “Bakı ağırlaşdırıcılar”, “Azərkabel”, “Bakı universal maşınqayırma”, “Bakı məişət maşınları”, “Bakı rezin məmulatları” və s. səhmdar cəmiyyətləri də vardır.
Ümumiyyətlə, indiyədək dövlət müəssisələrinin bazasında 1377 səhmdar cəmiyyəti yaradılmışdır.
Bölmənin digər xəbərləri
