İQTİSADİ İNKİŞAF NAZİRLİYİNİN MƏLUMATI
“Kütləvi informasiya vasitələrinə dövlət qayğısının artırılması sahəsində əlavə tədbirlər haqqında” Azərbaycan Respublikası Prezidentinin 27 dekabr 2001-ci il tarixli Sərəncamından irəli gələn vəzifələrin icrasını təmin etmək məqsədi ilə İqtisadi İnkişaf Nazirliyi müvafiq tədbirlər həyata keçirir. Belə ki, kütləvi informasiya vasitələrinin iqtisadi müstəqilliyinə təminat, özəl mətbəələrin inkişafının stimullaşdırılması məqsədi ilə onlara güzəştli kreditlər verilməsi planlaşdırılıb. Bununla bağlı, kütləvi informasiya vasitələri nazirliyin Sahibkarlığın inkişafı və dövlət əmlakının idarə edilməsi departamentinə müraciət edə bilərlər.
Bundan başqa, özəlləşmədən daxil olan vəsaitin qanunvericiliklə müəyyən olunmuş hissəsi müəssisələrin özəlləşdirməqabağı restrukturizasiyası, sağlamlaşdırılması və özəlləşdirilmiş müəssisələrin dəstəklənməsi tədbirlərinin həyata keçirilməsi üçün nəzərdə tutulmuşdur.
Odur ki, özəlləşməyə açılmış nəşriyyat və poliqrafiya müəssisələri (məlumat-reklam müəssisələri, mətbəələr, emalatxanalar və s.) də sağlamlaşdırma tədbirlərinin həyata keçirilməsi üçün maliyyə yardımının göstərilməsinə vəsait ayrılması ilə əlaqədar nazirliyin Dövlət əmlakının özəlləşdirilməsi departamentinə müraciət edə bilərlər.
Bununla yanaşı, Azərbaycan Respublikası Nazirlər Kabinetinin 31 yanvar 2002-ci i il tarixli qərarı ilə yaradılmış Tarif (qiymət) Şurasında özəl teleradioların yerlərdə yayılması ilə bağlı müəyyənləşdirilmiş tariflərə yenidən baxılması da nəzərdə tutulur.
Bölmənin digər xəbərləri
