İQTİSADİYYAT
İQTİSADİYYAT İNSTİTUTUNDA GÖRÜŞ
Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyasının üzvləri və işçi qrupunun əməkdaşları fevralın 13-də Azərbaycan Milli Elmlər Akademiyasının İqtisadiyyat İnstitutunun kollektivi ilə görüşmüşdür.
Görüşü institutun direktoru, AMEA-nın müxbir üzvü Şahbaz Muradov giriş sözü ilə açaraq, Xocalı soyqırımının onuncu ildönümü ərəfəsində bu elmi tədqiqat ocağının kollektivi ilə görüşə gəldiklərinə görə, dövlət komissiyasının üzvlərinə və işçi qrupu əməkdaşlarına təşəkkürünü bildirdi.
Sonra işçi qrupunun referenti Eldar Səmədovun “Əsir və itkin düşmüş, girov götürülmüş Azərbaycan vətəndaşları: erməni təcavüzünün qurbanları” mövzusunda məruzəsi dinlənildi. Məruzəçi azərbaycanlı əsirlərə ermənilər tərəfindən verilən işgəncələr, xalqımıza qarşı törədilmiş etnik təmizləmə və soyqırımı siyasəti barədə təkzibedilməz faktlar gətirdi, erməni vəhşiliklərinin bütün dünya ictimaiyyətinə çatdırılmasının ümumxalq işi olduğunu vurğuladı. O, Dövlət Komissiyasının və işçi qrupunun fəaliyyəti barədə də məlumat verdi.
Görüşdə iqtisad elmləri doktoru Nəbi Nəbiyev, dövlət komissiyasının üzvü, Respublika Hərbi Prokurorunun birinci müavini Siyasət Alıyev, AMEA-nın müxbir üzvü Ağasəlim Ələsgərov, İqtisad Elmləri namizədi İsa Alıyev və başqaları çıxış etdilər.
Ş.Muradov görüşə yekun vuraraq, belə tədbirlərin müntəzəm keçirilməsinin vacib olduğunu söylədi. O, Ermənistan silahlı qüvvələrinin Azərbaycanda törətdikləri vəhşilikləri, ermənilərin xalqımıza qarşı uzun illərdən bəri apardığı soyqırımı siyasətini bütün dünyaya bəyan etməyin zəruriliyini nəzərə çarpdırdı.