İqtisadiyyat Nazirliyi tərəfindən 13 minə yaxın lisenziya verilib
Bakı, 24 avqust, AZƏRTAC
İndiyədək İqtisadiyyat Nazirliyi tərəfindən 12 min 913 lisenziya, həmçinin “Lisenziyalar və icazələr” portalı vasitəsilə 2987 elektron lisenziya verilib.
Nazirliyin mətbuat xidmətindən AZƏRTAC-a bildirilib ki, ümumilikdə verilmiş lisenziyaların 65 faizə qədəri, o cümlədən cari ilin ötən dövründə verilmiş lisenziyaların 85 faizi yeni lisenziyalardır və bu da aparılan islahatların nəticəsi olaraq sahibkarlıq fəaliyyətinin genişləndiyini göstərir. Pandemiya ilə əlaqədar qlobal çağırışlara uyğun olaraq elektron ticarətin artımı sürətli poçt fəaliyyəti üzrə verilmiş lisenziyaların artımına təsir edib, 2020-2021 və 2022-ci ilin ötən dövründə 140-dan çox sahibkara sürətli poçt xidməti üzrə lisenziya verilib.
Azərbaycanda əlverişli biznes mühitinin yaradılması, sahibkarlıq sahəsində qanunvericiliyin, inzibati prosedurların və dövlət-sahibkar münasibətlərinin təkmilləşdirilməsi, sahibkarlıq fəaliyyətinin tənzimlənməsi, bu sahədə səmərəliliyin artırılması və şəffaflığın təmin edilməsi Prezident İlham Əliyev tərəfindən qarşıya qoyulmuş əsas vəzifələrdəndir və bu istiqamətdə ardıcıl olaraq tədbirlər həyata keçirilir. Biznes sferasının tənzimlənməsi istiqamətlərindən biri də sahibkarlıq fəaliyyətinin lisenziyalaşdırılmasıdır. Bu sahədə aparılmış islahatların nəticəsi olaraq, lisenziyalaşdırılan fəaliyyət növlərinin sayı əhəmiyyətli dərəcədə azalıb. İslahatların tərkib hissəsi kimi ölkəmizdə “Lisenziyalar və icazələr haqqında” Qanun qəbul edilib, lisenziyalarla yanaşı, icazələrin də siyahısı müəyyən olunub. İslahatlar aparılarkən lisenziya tələb edən fəaliyyət növlərinin sayı 59-dan 36-ya endirilib, icazələrin sayı isə 86 müəyyən edilib. İqtisadiyyat Nazirliyi tərəfindən verilən lisenziyaların sayı 23-dür.
Lisenziyaların verilməsi müddəti 15 iş günündən 10 iş gününə endirilib, dövlət rüsumunun məbləği 2 dəfə azaldılıb. Qanunvericiliyə əsasən, hazırda sellülar (mobil) rabitə xidmətləri istisna olmaqla lisenziyaların müddətsiz verilməsi müəyyən edilib.
Prezident İlham Əliyevin müvafiq Fərmanı ilə lisenziyalar 2015-ci il noyabrın 2-dən İqtisadiyyat Nazirliyi tərəfindən “ASAN xidmət” mərkəzləri vasitəsilə verilir. 2018-ci il 14 mart tarixindən lisenziyaların “Lisenziyalar və icazələr” portalı üzərindən də verilməsinə başlanıb. Sahibkarların işinin daha da asanlaşdırılması məqsədilə 2020-ci ilin fevralından lisenziyaların verilməsi KOB evləri vasitəsilə də həyata keçirilir.
Bölmənin digər xəbərləri
