İRAN İSLAM İNQİLABININ 26-CI İLDÖNÜMÜNƏ HƏSR OLUNMUŞ MƏTBUAT KONFRANSI
AZƏRTAC xəbər verir ki, fevralın 8-də İİR-in Azərbaycandakı səfiri Əfşar Süleymani Beynəlxalq Mətbuat Mərkəzində İran İslam İnqilabının 26-cı ildönümü münasibətilə mətbuat konfransı keçirmişdir.
Diplomat 26 il əvvəl fevralın 11-də baş vermiş inqilabı xarakterizə etmiş, ötən illər ərzində İranın ictimai-siyasi həyatındakı dəyişiklikləri xatırlatmış, ölkəsinin iqtisadiyyatı barədə statistik rəqəmlər sadalamışdır. Qeyd etmişdir ki, İran İslam Respublikasının sosial-iqtisadi inkişafı üçün indiyədək 3 proqram həyata keçirilmişdir. Tezliklə yeni 20 illik plan çərçivəsində 4-cü proqramın reallaşdırılmasına başlanacaqdır.
Səfirin sözlərinə görə, inqilabdan sonra İranda təhsil sahəsi çox inkişaf etmişdir. Hazırda 67,47 milyon nəfər əhalinin 11,97 milyonu məktəbli, 2,5 milyondan çoxu tələbədir. Ölkədə 1801 adda mətbuat orqanı, 40 televiziya kanalı fəaliyyət göstərir.
Əfşar Süleymani İİR-in beynəlxalq və regional siyasəti barədə də danışmışdır. Demişdir ki, İran öz xarici siyasətində mehriban qonşuluq münasibətlərini əsas tutaraq regional və beynəlxalq səviyyələrdə qonşular və başqa ölkələrlə ikitərəfli əməkdaşlıq münasibətlərini genişləndirir. Azərbaycanla münasibətlərə gəldikdə isə, İİR dost və qardaş ölkə ilə əlaqələrin inkişafında çox maraqlıdır. Səfir xüsusi vurğulamışdır ki, Azərbaycan Prezidenti İlham Əliyevin İrana bu yaxınlarda başa çatmış səfəri və bu səfər çərçivəsində imzalanmış sənədlər müxtəlif sahələrdə əməkdaşlığımız üçün yeni üfüqlər açıb.
Diplomat jurnalistləri maraqlandıran suallara cavab vermişdir. O, İran-Ermənistan əlaqələri, bu əlaqələrin Azərbaycanla münasibətlərə təsiri barədə suala cavab verərək demişdir ki, İran heç vaxt Ermənistana yardım etməmiş və etməyəcəkdir.
Bölmənin digər xəbərləri
