İRAN UÇUŞ MƏSAFƏSİ 2 MİN KİLOMETR OLAN RAKET BURAXMIŞDIR

02.11.2006 [21:00]
Çap et
A⁺ A^-

AZƏRTAC Frans Press Agentliyinə istinadla xəbər verir ki, İranın cənubunda keçirilən “Böyük Peyğəmbər–2” hərbi təlimləri zamanı uçuş məsafəsi 2 min kilometr olan “Şəhab-3” ballistik raketləri sınaqdan çıxarılmışdır.

Agentliyin məlumatına görə, ayrılan döyüş başlıqları ilə təchiz edilmiş raketlər paytaxt Tehrandan 120 kilometr cənubda, Qum şəhəri yaxınlığındakı səhrada buraxılmışdır.

İslam inqilabı keşikçiləri korpusunun komandanı Rəhim Səfəvi bildirmişdir ki, indiki manevrlər “İran xalqının gücünü və ölkəni hər cür təhlükədən qorumaq əzmini” dünyaya nümayiş etdirməlidir.

On gün davam edəcək “Böyük Peyğəmbər-2” təlimlərinə hərbi dəniz və hərbi hava qüvvələri, habelə quru qoşunları və qeyri-nizami xalq bölmələri cəlb olunmuşdur.

Xatırladaq ki, “Böyük Peyğəmbər” manevrlərinin birinci mərhələsi martın axırlarında – aprelin əvvəllərində keçirilmişdir. Təlimlərdə 17 minədək hərbi qulluqçu iştirak etmiş və bir sıra silahlar, o cümlədən “Fəcr-3” ballistik raketi sınaqdan çıxarılmışdır.

İRAN UÇUŞ MƏSAFƏSİ 2 MİN KİLOMETR OLAN RAKET BURAXMIŞDIR

MÜƏLLİFLƏ ƏLAQƏ

Bölmənin digər xəbərləri