İranda polis əməkdaşı qətlə yetirilib
Bakı, 12 iyun, AZƏRTAC
İranın Xuzistan vilayətində (ostandarlıq) polis əməkdaşlarına atəş açılıb. Nəticədə bir polis həlak olub.
AZƏRTAC xəbər verir ki, ötən ilin sentyabrından İranda başlayan iğtişaşlar nəticəsində 10 nəfərdən çox polis qətlə yetirilib. Xuzistan və Sistan-Bəlucistan vilayətlərində polisə qarşı silahlı hücumlar daha çox müşahidə olunub.
İranın “Tasnim” xəbər agentliyinin məlumatına görə, Xuzistanda polis ilə yanaşı İran İslam İnqilabı Keşikçiləri Korpusuna dəstək verən könüllülərdən ibarət “Bəsic” qruplaşmasının üzvləri də atəşə tutulub və bir nəfər könüllü həlak olub.
Sosial şəbəkələrin İran seqmentinə nəzər yetirərkən məlum olur ki, polisin kütləvi aksiya iştirakçılarına qarşı törətdiyi qeyri-insani rəftara görə indi silahlı hücuma məruz qalır.
Xatırladaq ki, kütləvi aksiyalar zamanı İranın paytaxtı Tehran şəhəri də daxil olmaqla Yəzd, Kirman, Təbriz, İsfahan, Rəşt, Şiraz və digər şəhərlərində polis aksiyaçılara qarşı silah tətbiq edib və bunun nəticəsində 500-dən çox adam ölüb. Eyni zamanda, 100-dən çox aksiyaçı edam edilib. Onların təqsiri sadəcə olaraq kütləvi aksiyada iştirak etmək olub.
Bölmənin digər xəbərləri
