İraq Hörmüz boğazından neft tədarükü üçün qiymətləri aşağı salıb
Bakı, 5 may, AZƏRTAC
İraq Hörmüz böhranı fonunda xam neft alıcılarına endirimli qiymətlər təklif etmək qərarına gəlib.
AZƏRTAC xarici mediaya istinadla xəbər verir ki, İraqın Dövlət Neft Marketinq Şirkəti (SOMO) may ayında Hörmüz boğazından keçəcək tankerlər üçün alıcılara neft qiymətlərini aşağı salıb.
Belə ki, “Basrah Medium” markalı xam neftin bir bareli 33,4 dollaradək endirimlə təklif edilir. Bu endirim 1-10 may tarixləri arasında yüklənəcək neftə şamil olunur, ayın qalan hissəsində endirim 26 dollar olacaq. “Basrah Heavy” markalı neft isə əsas qiymətdən 30 dollar aşağı təklif edilir.
Şirkətin məlumatında deyilir ki, SOMO-nun bu təklifi bütün tərəflərə artıq məlum olan mövcud müstəsna hallarda edilir və fors-major hallar bu təklifə şamil olunmayacaq.
Qeyd edək ki, Hörmüz boğazı fevral ayının sonlarında Yaxın Şərqdə müharibə başlayandan bəri demək olar ki, keçilməz olub. Regionun aparıcı istehsalçılarından biri olan İraq Körfəzdən ixrac dayandırıldıqdan sonra saxlama tutumunu sürətlə doldurduğu üçün hasilatı azaltmağa başlayıb.
İraqın cənubundakı Bəsrə limanında yüklənən neft tankerlərinin sayı mart ayındakı göstəricidən - 12-dən aprel ayında 2-yə düşüb. Bunun səbəbi boş gəmilərin Hörmüz boğazı vasitəsilə Körfəzə daxil ola bilməməsidir. Limanda ayda 80-dək tanker yüklənə bilər.
Bölmənin digər xəbərləri
