İRKUTSKDA SUİTİNİN “ŞƏXSİ” SƏRGİSİ AÇILMIŞDIR

29.12.2005 [15:17]
Çap et
A⁺ A^-

AZƏRTAC “Novosti” agentliyinə istinadla xəbər verir ki, İrkutskda suitinin “şəxsi” rəsm sərgisi açılmışdır. Sərgiyə gələnlər Baykal gölünün sakini Tito adlı kürəkayaqlının 39 ən yaxşı rəsm əsərinə baxacaqlar.

İki ildir İrkutsk nerpinarisində (kürəkayaqlıların saxlandığı hovuz) yaşayan Tito rəsmlərini hovuzun kənarına bərkidilmiş lövhədə sulu boya ilə çəkir. Fırçaları isə təlimçinin əlindən alaraq dişləri ilə tutur.

Alimlərin fikrincə, mücərrəd üslubda çəkilən rəsmlərdə real həyat cizgilərini də sezmək mümkündür. Tito çəkdiyi şəkili bəyənmədikdə kürəklərini suya vuraraq damcılarla cizgiləri silir. Rəsmlərində göy, sarı, qırmızı və qara rənglərə üstünlük verir. Nerpinarinin əməkdaşlarının “Baykalyanı tayqada yanğın” adlandırdıqları rəsmdə Tito yaşıl ağacları alova və qara tüstüyə bürünmüş şəkildə təsvir etmişdir.

Sərginin təşkilatçıları dünyada yeganə rəssam suitinin adının Rusiyanın Rekordlar kitabına daxil edilməsi məsələsini qaldırmaq niyytindədirlər.