İŞĞAL OLUNMUŞ AZƏRBAYCAN ƏRAZİLƏRİNDƏN NARKODƏHLİZ KİMİ İSTİFADƏ OLUNUR
AZƏRTAC xəbər verir ki, Böyük Britaniyanın Gömrük və Aksiz Vergilər Nazirliyi Beynəlxalq Yardım üzrə İdarəsinin nümayəndə heyəti Azərbaycanın gömrük və aksiz vergiləri sahəsində texniki yardım imkanlarını öyrənmək məqsədi ilə ölkəmizə səfərə gəlmişdir.
Fevralın 9-da nümayəndə heyətinin Dövlət Gömrük Komitəsinin sədrinin birinci müavini, gömrük xidməti general-leytenantı Aydın Əliyevlə görüşündə Azərbaycan gömrüyünün keçdiyi inkişaf yolu barədə qonaqlara məlumat verilmişdir. Bildirilmişdir ki, Azərbaycan gömrüyü Qərb ölkələri arasında ilk sənədi məhz Böyük Britaniya ilə imzalamışdır.
Ümumdünya Gömrük Təşkilatının Bakıdakı Regional Tədris Mərkəzi və kinoloji xidmət mərkəzinin bu gün dünya standartlarına tam münasib iş prinsipləri ilə işlədiyini söyləyən Aydın Əliyev narkotiklərin qanunsuz dövriyyəsinə qarşı mübarizə istiqamətində də ölkəmizdə faydalı iş aparıldığını vurğulamışdır. O, Ermənistan silahlı qüvvələrinin işğal etdiyi, hazırda beynəlxalq monitorinqdən kənar qalmış nəzarətsiz Azərbaycan ərazilərindən Avropaya narkotiklərin ötürüldüyünü, bu ərazilərin əsil narkodəhliz olduğunu bildirmişdir.
Qonaqlar Əndryu Arjil, Naqara Harcinder və xanım Kelli Veryard görülmüş işləri təqdirəlayiq sayaraq, Azərbaycan Dövlət Gömrük Komitəsinin texniki yardıma ehtiyacları ilə də maraqlanmışlar.
Nüfuzlu beynəlxalq qurumlarla əməkdaşlıq çərçivəsində alınan texniki yardımlardan danışan Aydın Əliyev Azərbaycana verilən katerlərin sahil mühafizəsi işində yararlı olduğunu, bundan başqa narkotiklərin daha dəqiq və operativ aşkarlanması üçün xüsusi cihaz və avadanlığa ehtiyac duyulduğunu diqqətə çatdırmışdır.
Sonra britaniyalı gömrükçülər ÜGT-nin Bakıdakı Regional Tədris Mərkəzi və Kinoloji Mərkəzlə tanış olmuşlar.
Bölmənin digər xəbərləri
