İspaniyada koronavirusdan ölüm halları yenidən artıb
Bakı, 16 aprel, AZƏRTAC
İspaniyada son sutka ərzində koronavirusdan 551 xəstə ölüb, ümumilikdə pandemiya müddətində ölkədə 19 min 130 insan həyatını itirib.
AZƏRTAC El Pais qəzetinə istinadla xəbər verir ki, ölümlərin son göstəricisi ötən günə nisbətən çoxalıb. Belə ki, bir gün əvvəl 523 ölüm faktı qeydə alınmışdı.
İspaniyada koronavirusa yoluxananların sayı 2,9 faiz artaraq 182,8 min nəfərə yüksəlib, 75 min nəfər sağalıb.
Qəzet qeyd edir ki, bugünkü artıma baxmayaraq, məlumatlar İspaniyada ölüm hallarının azalma tendensiyasının davam etdiyini göstərir. Ölümlərin pik həddi aprelin 2-də qeydə alınmışdı. Həmin gün koronavirus 950 nəfərin həyatına son qoymuşdu.
İspaniya aşkar edilən yoluxma hallarının sayına görə dünyada ABŞ-dan sonra ikinci, ölüm hallarının sayına görə isə ABŞ və İtaliyadan sonra üçüncü yeri tutur.
Bölmənin digər xəbərləri
