İsrail “Pfizer” kompaniyasından milyonlarla əlavə vaksin dozası alacaq
Bakı, 20 aprel, AZƏRTAC
İsrail 2022-ci ilə qədər COVID-19 əleyhinə milyonlarla əlavə vaksin dozasının alınması üzrə “Pfizer” kompaniyası ilə müqavilə imzalayıb.
AZƏRTAC Reuters informasiya agentliyinə istinadla xəbər verir ki, bu barədə İsrailin Baş naziri Binyamin Netanyahu məlumat verib. “Yeni vaksin dozaları insanları koronavirusun müxtəlif ştammlarından qoruyacaq”, - deyə İsrailin Baş naziri bildirib.
Onun sözlərinə görə, hökumət “Moderna” kompaniyası ilə də müvafiq razılaşmanın imzalanacağına ümid edir.
“Bu o deməkdir ki, yaxın zamanlarda həm yaşlılar, həm də uşaqlar üçün həddən artıq vaksinimiz olacaq”, - deyə Binyamin Netanyahu əlavə edib.
Qeyd edək ki, İsraildə COVID-19 əleyhinə aktiv vaksinasiya kampaniyası dekabr ayında başlayıb və indiyə qədər əhalinin yarıdan çoxu tam peyvənd olunub. Hazırda ölkədə yeni yoluxma hallarının xeyli azalması səbəbindən xəstəxanalardakı koronavirus şöbələrinin bağlanmasına başlanılıb.
Bölmənin digər xəbərləri
