İSTANBULDA GUÖAM DÖVLƏTLƏRİ XARİCİ İŞLƏR NAZİRLƏRİ ŞURASININ VI İCLASI KEÇİRİLMİŞDİR
Xarici İşlər Nazirləri Şurası 2003-cü il sentyabrın 26-da Nyu-Yorkda keçirilmiş GUÖAM XİNŞ-in iclasının və GUÖAM-ABŞ görüşünün qərarlarının yerinə yetirilməsini müzakirə etmişdir. XİNŞ-in iclasında nazirlər bir sıra sənədləri təsdiqləmişlər.
Şuranın iclasında GUÖAM-ın 2002-2003-cü illərdə Yaltada keçirilmiş zirvə toplantılarında imzalanan sənədlərin qüvvəyə minməsinə dair dövlətdaxili prosedurların tezliklə yerinə yetirilməsinin zəruriliyi vurğulanmışdır. Nazirlər “GUÖAM-ın iştirakçısı olan dövlətlər arasında azad ticarət zonası yaradılması haqqında saziş”i və “GUÖAM-ın İnformasiya ofisi haqqında Müvəqqəti Əsasnamə”ni hələ ratifikasiya etməyən dövlətləri bu sənədlərin ratifikasiyası prosesini sürətləndirməyə çağırmışlar. Sahə işçi qruplarının əlaqələndirici ölkələri barədə məsələyə də baxılmışdır.
İclas iştirakçıları beynəlxalq təşkilatlar çərçivəsində, GUÖAM ölkələrinin ümumi mövqelərinin qorunmasına, o cümlədən münaqişələrin dövlətlərin ərazi bütövlüyünün gözlənilməsi prinsipi əsasında nizama salınmasına dair birgə təşəbbüslərin vacibliyini nəzərə çarpdırmışlar.
Nazirlər BMT Baş Məclisi yanında müşahidəçi statusu nəzərə alınmaqla, 2004-cü il üçün BMT çərçivəsində əməkdaşlığın inkişafına dair GUÖAM ölkələrinin fəaliyyət planına müsbət qiymət vermişlər. Həmin plan Milli Əlaqələndiricilər Komitəsinin 2004-cü il martın 22-23-də Bakıda keçirilən iclasında təsdiq edilmişdir.
Nazirlər konkret layihələr hazırlanarkən ABŞ ilə sıx əməkdaşlığın xüsusilə vacibliyini və GUÖAM-ın təşəbbüslərinin ABŞ hökuməti tərəfindən fəal dəstəkləndiyini vurğulamışlar. Şura GUÖAM çərçivəsində nəzərdə tutulan layihələrin gerçəkləşdirilməsində Avropa Birliyi ilə əməkdaşlıqda maraqlı olduğunu və GUÖAM-AB və GUÖAM-ABŞ formatında dialoqun davam etdirilməsinə tərəfdar olduğunu da bildirmişdir.
XİNŞ-in iclasında nazirlər GUÖAM-ABŞ çərçivə proqramının həyata keçirilməsinin gedişini müzakirə etmiş və aşağıdakı razılaşdırılmış sənədləri təsdiqləmişlər:
-GUÖAM dövlətlərinin ticarətinə və daşımalarına yardım layihəsinin (TDYL) həyata keçirilməsinə dair Regional strategiyanın və Tədbirlər planının təsdiq edilməsi haqqında qərar;
-GUÖAM-ın Virtual Mərkəzinin (VM) və GUÖAM-ın dövlətlərarası informasiya-analitik sisteminin (DİAS) yaradılması haqqında layihələrin təsdiq edilməsi barədə qərar.
Nazirlər TDYL və VM/DİAS layihələrinin öz dövlətlərində gerçəkləşdirilməsinə qəti yardım göstərmək niyyətində olduqlarını təsdiqləmiş və bu layihələri nəqliyyat dəhlizlərinin ümumavropa sisteminin inkişafı ilə əlaqəli şəkildə həyata keçirməyin vacibliyini xüsusi vurğulamışlar.
XİNŞ-in iclasında GUÖAM ölkələrinin ərazilərindən keçən və təhlükəsiz, səmərəli fəaliyyət göstərəcək, beynəlxalq daşımaların rəqabət qabiliyyətli və təhlükəsiz xidmətlərini təmin edə biləcək nəqliyyat dəhlizi yaradılması haqqında beynəlxalq layihə ideyası bəyənilmişdir.
XİNŞ GUÖAM Parlament Assambleyasının 2004-cü ilin sentyabrında Kiyevdə ilk iclasının keçirilməsi haqqında qərarı da alqışlamışdır. Bu qərar Azərbaycan, Gürcüstan, Moldova və Ukrayna parlamentləri rəhbərlərinin Avropa Şurasının üzvü olan ölkələrin parlament başçılarının bu il mayın 17-19-da Strasburqda keçirilmiş konfransında qəbul olunmuşdur.
İclasda GUÖAM-ın 2004-cü il zirvə toplantısı çərçivəsində XİNŞ-in VII iclasını keçirmək haqqında qərar qəbul edilmişdir.
XİNŞ-in iclasının yekunlarına dair birgə rəsmi məlumat qəbul olunmuşdur.
Bölmənin digər xəbərləri
