İstanbulda keçiriləcək növbəti STRATCOM Zirvəsi beynəlxalq gündəmi müzakirəyə çıxaracaq
İstanbul, 25 mart, AZƏRTAC
AZƏRTAC xəbər verir ki, 38 ölkədən onlarla yüksəksəviyyəli şəxsi bir araya gətirəcək tədbirdə Yaxın Şərqdəki gərginlik, eləcə də beynəlxalq sistemlə bağlı mövcud suallar müzakirə ediləcək.
Türkiyənin vitse-prezidenti Cevdet Yılmaz, xarici işlər naziri Hakan Fidan və Milli Kəşfiyyat Təşkilatının rəhbəri İbrahim Kalın, həmçinin 10 ölkədən 11 nazir və 60-dan çox yüksəksəviyyəli rəsminin qatılacağı STRATCOM Zirvəsi bu il “Beynəlxalq sistemdə qopma: Böhranlar, narrativlər və nizam axtarışı” mövzusu ilə təşkil olunacaq.
İki gün davam edəcək tədbirdə beynəlxalq sistemdə baş verən parçalanmalar, bunun nəticəsində ortaya çıxan böhranlar və qlobal nizam axtarışına dair müxtəlif bölgələrin yanaşmaları ətrafında fikir mübadiləsi aparılacaq.
Mövzu ilə bağlı sosial media hesabında açıqlama verən Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Burhanettin Duran bildirib ki, tədbirin məqsədi strateji kommunikasiyanın gücündən istifadə edərək beynəlxalq əməkdaşlığı möhkəmləndirmək və ortaq düşüncəni hərəkətə gətirməkdir. O qeyd edib ki, bu Zirvə yalnız bir görüş deyil, həm də qlobal problemlərin həlli istiqamətində güclü iradə nümayişidir.
Kommunikasiyanı böhranların idarə olunması və davamlı həllərin qurulmasında ən təsirli vasitələrdən biri kimi qiymətləndirən Duran qeyd edib ki, Prezident Rəcəb Tayyib Ərdoğanın baxışına uyğun təşkil olunan STRATCOM Zirvəsi qlobal problemlər üçün ortaq dilin formalaşdırılmasına, dialoq kanallarının gücləndirilməsinə və daha ədalətli beynəlxalq sistemin qurulmasına töhfə verməyi hədəfləyir.
Artan geosiyasi gərginliklər, iqtisadi dalğalanmalar və müxtəlif böhranların fonunda keçiriləcək Zirvədə təkcə beynəlxalq sistemdəki struktur dəyişiklikləri deyil, eyni zamanda, getdikcə güclənən qlobal narrativ rəqabəti də müzakirə olunacaq.
Qeyd edək ki, STRATCOM Zirvəsi Münhen Təhlükəsizlik Konfransından sonra beynəlxalq sistemin gələcəyini strateji kommunikasiya baxımından müzakirə edən ilk yüksək səviyyəli platforma olmaq xüsusiyyətini daşıyır. Zirvə xüsusilə Yaxın Şərqdəki müharibənin beynəlxalq səviyyədə geniş şəkildə müzakirə ediləcəyi mühüm bir mühit təqdim edəcək.
Bölmənin digər xəbərləri
