ELM VƏ TƏHSİL
İSTANBULUN MƏRMƏR DARVAZASI ÜZƏ ÇIXIB
AZƏRTAC-ın Ankaradan aldığı xəbərə görə, İstanbulu fəth edən sultan II Məhəmməd Fatehin şəhərə daxil olduğu yeri müəyyənləşdirmək mümkün olmuşdur. 1453-cü ildə türklər tərəfindən mühasirəyə alınmış İstanbulu fəth edən sultanın şəhərə daxil olduğu yerin müəyyənləşdirilməsinə 500 ildən artıq bir zamanın keçməsi gərəkmiş.
Bu tarixi kəşf etmək Berlin Universitetinin aspirantı Nəsilxan Asutaya nəsib olmuşdur. O, tarix elmləri doktoru elmi dərəcəsi almaq üçün Almaniyada dissertasiya müdafiə etməyə hazırlaşır.
Tarixi dəyərə malik bu faktı üzə çıxarmağa N.Asutaya tam təsadüf kömək etmişdir. 1999-cu ilin avqustunda İstanbulu lərzəyə gətirən zəlzələ nəticəsində Millət bulvarının yaxınlığında 500 il bundan əvvəl İstanbulu əhatə edən tarixi qala divarı dağılır. Divar uçan yerdə mərmər daş parçaları aşkar olunur. Tarixi sənədlər də təsdiq edir ki, İstanbulun mərmərdən tikilmiş baş darvazasının üzərində “Müqəddəs Romaya aparan orta darvaza” yazısı var imiş.