İstedadlı baletmeyster: Rəqs mənim həyatımın ritmidir
Bakı, 21 fevral, Fidan Əlizadə, AZƏRTAC
Müsahibimiz bir çox beynəlxalq rəqs müsabiqələrinin, festivalların iştirakçısı və laureatı, Bakı Xoreoqrafiya Akademiyasının tələbəsi Aslana Əliyevadır. Aslana üç yaşından peşəkar səviyyədə rəqs etməyə başlayıb. Həmçinin Heydər Əliyev Fondunun təşəbbüsü ilə tikilmiş Daun Sindromlu Şəxslərin Reabilitasiya Mərkəzində xüsusi qayğıya ehtiyacı olan uşaqlarla işləyir. Aslana Əliyeva burada qruplarla məşğələlərdən əlavə, rəqs kollektivinə də rəhbərlik edir. İstedadlı baletmeyster deyir ki, həyatının ən önəmli hissəsi rəqsdir. Rəqs onun həyatının ritmi, ayrılmaz hissəsidir və nə qədər çətin olsa da, çox şaddır ki, bu yolu seçib.
- Klassik balet üzrə təhsiliniz və bu sahədəki təcrübəniz sizə hansı üstünlükləri qazandırıb?
- Klassik şöbədə oxumağım mənim üçün möhkəm bünövrə oldu. Akademiklik və dəqiqlik rəqsdə çox vacibdir, bunu klassik təhsil sayəsində öyrəndim. Müxtəlif rəqslər qurmağa həmişə marağım olub və düşünürəm ki, klassik sahədə bazam mənə bu sahədə böyük üstünlük verir. İlk müəllimim - Əməkdar mədəniyyət işçisi Mayra Almaszadə mənim perspektivimin açılmasında önəmli rol oynayıb. Ümumiyyətlə, Xalq artistləri Roza Cəlilova, Təranə Muradova, Cəmilə Bayramova, Əməkdar artistlər Eteri Cəfərova, Sənan Hüseynli, Gülməmməd Şahverdiyev kimi böyük sənətkarlar mənə bu sənəti sevdirib və mənim üçün peşəkar məktəb olublar.
- Baletmeyster ixtisasını seçməyinizin xüsusi bir səbəbi varmı?
- Uşaqlıqdan baletmeyster olmağı arzulamışam. Azərbaycan rəqsinin zənginliyi və folklorumuzun gözəlliyi məni daim ruhlandırıb. Milli şöbəyə qəbul olmaq mənim üçün yeni bir təcrübə idi. Həmişə Azərbaycan rəqsinə yeni elementlər əlavə edib onları daha da bəzəmək istəmişəm, amma çərçivədən çıxmamaq şərtilə. Rəqslərimizdə incəlik və zəriflik çox önəmlidir. Bəzən görürəm ki, milli rəqslərimizə başqa millətlərin elementləri əlavə olunur. Amma Azərbaycan rəqsləri elə öz mahiyyətində ən gözəllərdən biridir və mən bu sənəti qorumağa, inkişaf etdirməyə çalışıram. Həmçinin milli geyimlərimiz dəyişdirilir. Bizim irsimiz silinməməli, milli atributlarımız sabit qalmalıdır. Mən çox istərdim ki, libaslarımızda da milli naxışlar əks olunsun.
- Özbəkistanda qazandığınız təcrübə həyatınızda hansı izləri qoyub?
- 2024-cü ildə - ikinci kursda oxuyarkən təhsildə yüksək göstəricilərimə görə akademiyanın rəhbərliyi məni dövlət hesabına bir illik qardaş Özbəkistana göndərdi. Orada məni çox isti qarşıladılar və ən güclü müəllimlərlə işləmək şansı qazandım. Bu, mənim ilk böyük səfərim idi. Ailəm hər zaman məni dəstəkləyib, gələcəyimə işıq olub. Özbək rəqsi Azərbaycan rəqsindən çox fərqlənir, yəni, hər bir əzələ işləyir. Bu, mənim üçün yeni və çətin bir məktəb oldu, amma səbir və əzmlə öyrəndim. Özbəkistan Dövlət “Bahor” rəqs ansamblına Azərbaycan rəqsi üzrə ustad dərsi keçmək də mənə qismət oldu. Həmin müddətdə özbək rəqslərinin 5 məktəbi ilə tanış oldum.
Bir semestr orada oxuyub Vətənə qayıtdım, lakin işimi çox bəyəndikləri üçün və özüm də çox istədiyimə görə ikinci dəfə oraya göndərildim. Özbəkistandakı Heydər Əliyev adına Azərbaycan Mədəniyyət Mərkəzində baletmeyster-xoreoqraf kimi çalışmağa başladım. Orada “Azərbaycan” adlı uşaq kollektivi ilə işlədim. Bu il yanvarın 31-də Azərbaycan-Özbəkistan dostluğu və Gənclər Gününə həsr olunmuş tədbirdə ilk böyük konsertimi qurdum. Bu, mənim üçün böyük məsuliyyət idi və təkcə xoreoqraf deyil, həm də rejissor kimi böyük təcrübə qazandım. Konsertdə Özbəkistanın dövlət ansamblı “Navbahor” da iştirak etdi və tədbir çox uğurlu keçdi. Konsertin finalını Qara Qarayevin “Yeddi Gözəl” baletinin valsı ilə qurmaq ən böyük arzularımdan idi və onu reallaşdırdım. Səhnədə Azərbaycan Respublikasının Özbəkistan Respublikasındakı fövqəladə və səlahiyyətli səfiri Hüseyn Quliyev tərəfindən Fəxri fərmanla mükafatlandırılmaq isə unudulmaz an idi. Mənə yaradıcılığımda dəstək olan Bakı Xoreoqrafiya Akademiyasının, Özbəkistan Dövlət Xoreoqrafiya Akademiyasının və Azərbaycan Mədəniyyət Mərkəzinin rəhbərliklərinə dərin təşəkkürümü bildirirəm.
- Rəqslə məşğul olmaq nə dərəcədə çətindir və bu sənətin üstünlükləri hansılardır?
- Bu sənət inanılmaz dərəcədə çətindir. Həftənin yeddi günü həm işləyirəm, həm də məşq edirəm. İstirahətə zaman qalmır. Bu sənət insana güclü xarakter və iradə verir. Yorğun olsam da, ağrılarım olsa da, məşqimi yarımçıq qoymuram. Hədəfim varsa, axıra qədər gedirəm, çünki gözəl nəticələr üçün mübarizə aparmaq lazımdır.
- Peşəkar rəqqasə olmaq istəyənlərə nə məsləhət görərdiniz?
- Ən əsası, səbir, məsuliyyət və daim çalışmaqdadır. Dünya rəqslərinin tarixini bilmək çox vacibdir. Fərqli mədəniyyətlərlə maraqlanmaq və öz üzərində daim işləmək lazımdır. Mən də daim yeni şeylər öyrənməyə, müxtəlif ölkələrin mədəniyyətlərini araşdırmağa çalışıram. Bu yaxınlarda 30 ildən sonra ilk dəfə keçirilən “Bakı payızı” layihəsində böyük uğur qazandıq. Peşəkar olmaq üçün insanın istəyi, əzmi və sevgisi çox vacibdir. Arzum Azərbaycan rəqsini dünyada daha geniş tanıtmaq və milli rəqslərimizi həm müasir, həm də ənənəvi formada qoruyub inkişaf etdirməkdir. Rəqs mənim həyatımın mənasıdır və bu sənətdə daha böyük uğurlara imza atmaq istəyirəm. Mədəniyyətimizə dəstək olan insanlarla işləmək və yeni nəslə bu sevgini ötürmək, rəqsin gözəlliyini təbliğ etmək və gələcək nəsillərə ötürə bilmək vacibdir, mənim üçün böyük qürurdur...
Bölmənin digər xəbərləri
