İSTİFADƏSİ QADAĞAN OLUNAN MALLAR YANDIRILARAQ MƏHV EDİLMİŞDİR
97 milyon 309 min manat dəyərində olan həmin mallar qaçaqmalçılıq yolu ilə respublikamıza gətirilərkən Xaçmaz, Tovuz və Astara gömrükxanalarının əməkdaşları tərəfindən tutulmuş, müvafiq məhkəmə qərarları ilə müsadirə edilmişdir. Müxtəlif ölkələrin istehsalı olan tütün məmulatı Səhiyyə Nazirliyinin Bakı şəhər Gigiyena və Epidemiologiya Mərkəzinin rəyinə əsasən istifadəyə yararsızdır. Bundan başqa 24 min 390 ABŞ dolları dəyərində olan 14 bağlama “Hollivud” siqareti üçün qablaşdırma kağızı Astara gömrükçüləri tərəfindən saxlanılmışdır. Araşdırma zamanı Hindistanın “İTC Limited” təşkilatı tərəfindən Gürcüstanın “British Amerikan Tobacco Georgiya” kampaniyasına göndərilən həmin kağız məmulatın Ermənistan üçün nəzərdə tutulduğu müəyyənləşdirilmişdir.
Daxili istehsallı alkoqollu içkilərə aid 497 min 629 ədəd saxta aksiz markası, həmçinin aksiz markasına oxşar lentlərin məhvi barədə də qərar çıxarılmışdır.
Xaçmaz, Biləsuvar, Tovuz gömrükxanalarının əməkdaşları tərəfindən tutulmuş, ümumi çəkisi 130,105 kiloqram olan qara kürünün Ədliyyə Nazirliyinin Elmi-Tədqiqat Məhkəmə Ekspertizası, Kriminalistika və Kriminologiya Problemləri İnstitutunun verdiyi ekspert arayışına əsasən yeyinti məhsulu kimi yararsızlığı aydınlaşmışdır. Müxtəlif adda 17 min 303 manat dəyərində dərman preparatları və ləvazimatları Səhiyyə və Ədliyyə nazirliklərinin rəylərinə əsasən yararsız hesab edilmişdr.
Bölmənin digər xəbərləri
