İsveç polisi Landskruna şəhərində partlayışın hazırlanmasında şübhəli bilinənlərin axtarışına başlayıb
Stokholm, 8 avqust, AZƏRTAC
İsveç polisi Landskruna şəhərində partlayışın hazırlanmasında və həyata keçirilməsində şübhəli bilinənlərin axtarışına başlayıb.
AZƏRTAC İsveç KİV-lərinə istinadla xəbər verir ki, asayiş keşikçiləri avqustun 7-də axşam saatlarında Landskruna şəhərinin yerli idarəetmə orqanının binası yanında törədilmiş partlayışdan sonra şübhəliləri axtarır. Hadisə şəhər şurasının məmurlarını qəzəbləndirib.
Partlayış nəticəsində binanın giriş qapısı, məlum heykəl və bir neçə pəncərə zədələnib, lakin xoşbəxtlikdən heç kəs ziyan çəkməyib. Polis nümayəndələri avqustun 8-də mətbuat konfransında bildiriblər ki, partlayışın səbəblərindən danışmaq çox tezdir. Onlar cinayətin mümkün səbəblərini açıqlamaqdan da imtina ediblər.
Polis rəisi Patrik Heymbrand jurnalistlərə müsahibəsində partlayışı cəmiyyətə və demokratiyaya daha bir xain hücum adlandırıb.
Qeyd edək ki, bu yay Landskruna şəhərində kriminal aləmdə nüfuz dairəsi uğrunda mübarizə ilə əlaqədar bir neçə qanlı cinayət törədilib.
Rauf Əliyev
AZƏRTAC-ın xüsusi müxbiri
Stokholm
Bölmənin digər xəbərləri
