İsveç polisi zorakılıq qurbanı olan 600 uşaq müəyyən edib
Stokholm, 18 fevral, Nərgiz Cəfərli, AZƏRTAC
İsveç polisi sənədləşdirilmiş seksual zorakılığın qurbanı olmuş uşaqları müəyyən etməyin yeni metodunu hazırlayıb.
AZƏRTAC xəbər verir ki, 2024-cü ildə yaradılmış milli komandanın işi sayəsində foto və videomateriallar üzrə internetdə 600 uşağı müəyyən etmək mümkün olub.
Yeni metod süni intellekt funksiyaları olan analitik proqram və İnterpolun məlumatlar bazası əsasında yaradılıb. Yeni texnologiya polisə sübut və qurbanları daha tez aşkar etməyə imkan verir və bununla da minlərlə faylı bir-bir əl ilə yoxlamaq zərurəti yaranmır.
“İşimizi əhəmiyyətli dərəcədə təkmilləşdirmişik. Lazımi materialları daha tez əldə etməyi bacarmışıq”, - deyə Milli Operativ Polis Şöbəsinin mütəxəssisi Luiza Olen bildirib.
Texnologiyalardan istifadə etməkdən əlavə polis regionlar arasında qarşılıqlı əlaqələri gücləndirib. İndi bütün regionlarda qurban və cinayətkarları operativ axtaran ixtisaslaşmış qruplar mövcuddur.
“Uşaqların axtarışı cinayətin üstünü açmaqda vacib mərhələdir. Uşağı tapa biliriksə, böyük ehtimalla cinayətkarı da müəyyən edə bilərik”, - deyə Olen əlavə edib.
Yeni metod təkmilləşdirilməkdə davam edir, komanda isə dəyişkən vəziyyətlərə daha tez uyğunlaşır.
Bölmənin digər xəbərləri
