İtaliya Azərbaycandan təbii qaz tədarükünün artırılmasında maraqlıdır
Roma, 2 fevral, AZƏRTAC
İtaliya hökuməti Azərbaycan təbii qazının tədarükünün artırılmasında maraqlıdır.
AZƏRTAC İtaliyanın Xarici İşlər və Beynəlxalq Əməkdaşlıq Nazirliyinə istinadla xəbər verir ki, bu sözləri nazirliyin dövlət katibi Manlio Di Stefano Azərbaycanın energetika naziri Pərviz Şahbazovla telefon danışığında deyib.
Manlio Di Stefano bildirib ki, Trans-Adriatik (TAP) boru kəməri vasitəsilə hər il təxminən 8 milyard kubmetr Azərbaycan qazı İtaliyaya nəql olunur. Hazırda TAP öz tutumunun 80 faizi ilə qaz nəql edir.
O, TAP-ın tam işə salınması və ən qısa zamanda təbii qaz nəqlinin 10 milyard kubmetrə çatdırılmasının vacibliyini vurğulayıb.
Dövlət katibi, həmçinin təbii qaz təchizatı mənbələrinin şaxələndirilməsi və Avropanın enerji təhlükəsizliyinin artırılması məqsədilə TAP-ın ötürücülük qabiliyyətinin iki dəfə artırılmasının məqsədəuyğunluğunu qeyd edib. Vurğulanıb ki, TAP-ın infrastrukturu uzunmüddətli perspektivdə hidrogenin nəqli üçün istifadə edilə bilər.
Pərviz Şahbazov isə Azərbaycan hökumətinin TAP boru kəmərinin ötürücülük qabiliyyətini artırmağa hazır olduğunu bildirib. Nazir qeyd edib ki, hazırda bununla bağlı bazar sınaqları aparılır.
Tərəflər Azərbaycan Respublikası və İtaliya Respublikası arasında İqtisadi Əməkdaşlıq üzrə birgə Hökumətlərarası Komissiyanın növbəti iclasının təşkili barədə razılığa gəliblər. Həmçinin Azərbaycan ilə İtaliyanın tərəfdaşlıq və dostluq əlaqələrinin əhəmiyyəti vurğulanıb, iki ölkənin şirkətləri arasında çoxsaylı əməkdaşlıq imkanları xüsusi qeyd edilib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
