İtaliya Hərbi Hava Qüvvələrinə məxsus təyyarə qəzaya uğrayıb
Roma, 17 sentyabr, AZƏRTAC
İtaliya Hərbi Hava Qüvvələrinin milli akrobatika komandasına məxsus təyyarə qəzaya uğrayıb.
AZƏRTAC xəbər verir ki, məşq uçuşu üçün Turin şəhərinin “Caselle” hava limanından havaya qalxan təyyarə qısa müddət sonra naməlum səbəbdən qəzaya uğrayaraq yerə çırpılıb. Partlayış nəticəsində hadisə yerindən avtomobillə keçən ikisi uşaq olmaqla dörd nəfərlik ailənin 5 yaşlı qızı ölüb. Ailənin digər üzvləri müxtəlif dərəcəli xəsarət alıb və xəstəxanaya yerləşdiriblər.
Pilot isə təyyarədən atlayaraq xilas olub. Yüngül xəsarət alan pilotun da xəstəxanaya yerləşdirildiyi bildirilir.
Qəzadan sonra akrobatika komandasının bütün uçuşları dayandırılıb və “Caselle” aeroportu müvəqqəti olaraq hava nəqliyyatına bağlanıb.
Qeyd edək ki, İtaliya Hərbi Hava Qüvvələrinin yaranmasının 100 illiyi münasibətilə akrobatika komandası il boyu İtaliya şəhərləri üzərində uçuşlar həyata keçirir.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
