İtaliyada Milli Birlik və Silahlı Qüvvələr Günü qeyd edilir
Roma, 4 noyabr, AZƏRTAC
Noyabrın 4-də İtaliyada Milli Birlik və Silahlı Qüvvələr Günü qeyd olunur.
AZƏRTAC xəbər verir ki, İtaliya Prezidenti Sercio Mattarella bu münasibətlə paytaxt Romadakı “Altare della Patria” memorial kompleksində naməlum əsgər abidəsini ziyarət edib, önünə əklil qoyub.
Mərasimdə İtaliyanın Baş naziri Ciorcia Meloni, Senatın sədri İqnazio Benito Maria La Russa, Deputatlar Palatasının sədri Lorenzo Fontana, müdafiə naziri Quido Krosetto, Konstitusiya Məhkəməsinin sədri Ciovanni Amoroso və digər rəsmi şəxslər iştirak ediblər.
Daha sonra Sercio Mattarella nazir Quido Krosetto ilə birlikdə Venesiya meydanında yerləşdirilən bölmələrə baxış keçirib.
İtaliya Prezidenti Silahlı Qüvvələrə ünvanlandığı təbrik məktubunda isə deyib ki, hazırda Avropada və Aralıq dənizində yeni münaqişələr ortaya çıxıb və bu, müharibədən sonrakı dövrdə qurulmuş təhlükəsizlik çərçivəsinə və onu qorumaq üçün yaradılmış qurumlara meydan oxuyur.
“Rusiya-Ukrayna münaqişənin genişlənməsi təhlükəsi Atlantik Alyansı ilə sıx əməkdaşlıq çərçivəsində İtaliya və Avropa üçün təhlükəsizlik aləti olacaq ortaq Avropa müdafiə qüvvələrinin yaradılması üçün ordunun uyğunlaşdırılması üçün böyük diqqət və tələbkar səy tələb edir”, - deyə Sercio Mattarella bildirib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
