İtaliyanın “cənnət” adası - Kapri - FOTOREPORTAJ
Kapri, 9 iyul, AZƏRTAC
Tirren dənizində, Neapol körfəzinin cənubunda, Sorrento yarımadasının yaxınlığında yerləşən Kapri İtaliyanın və dünyanın ən məşhur adalarından biridir. Qədim Roma dövründə kəşf edilən bu ada o vaxtdan bəri yay kurort yeri kimi istifadə olunub, tarix boyu rəssamların, yazıçıların, ziyalıların və varlı təbəqənin sevimli adası olub və olmaqda davam edir. Kapri mavi sulara uzanan sıldırım qayaları, heyrətamiz mənzərələri, dənizdəki mağaraları, təmiz havası, ən məşhur brendlərin mağazaları hər zaman diqqət mərkəzində olub.
Adanı ilk kəşf edən Roma imperatoru Sezar Avqust olub. O, buraya heyran qalıb, sonradan Neapolu və İskiya adasını Kapri adasına dəyişib. Digər Roma imperatoru Tiberius isə həyatının son 10 ilini bu adada keçirib və burada 12 villa tikdirib. Rus ədəbiyyatının görkəmli simalarından olan Maksim Qorki də bir neçə il Kapri adasında yaşayıb. 1908-ci ildə o, məhz Kapridə özünün “Etiraf” əsərini yazıb.
Bir çox insan üçün “Yerdə cənnət olsaydı, bu, Kapri olardı” deyimini sübut edən bu vulkanik adanın gözəl mənzərəsi haqqında hədsiz mübaliğələr mövcuddur. Kapri adası deyiləndə ağıla məşhur simalar, paparatsilər, yaxtalar, “lüks həyatla bağlı hər şey” gəlir. Ernest Heminquey, Odri Hepbern, Qreys Kelli, Sofia və Giorgio Armani kimi məşhurlar adanın pərəstişkarları sırasında olublar. Ada Beyons, Leonardo DiKaprio və Keyt Apton kimi dünyaşöhrətli məşhurların istirahət üçün üz tutduqları yerdir. Kapri adası gözəlliyinə görə bir çox filmlərin çəkiliş meydançası olub və yəqin ki, bundan sonra da olacaq.
Adanın əsas yaşayış məntəqəsi Kapridir. Bundan əlavə, iki liman - Marina Grande və Marina Piccola və nəhayət Anakapri digər əsas yaşayış məntəqələridir. Kapri otellər, restoranlar, gecə klubları və butikləri ilə adanın şərqində yerləşən daha mərkəzi və turistik hissədir. Anakapri isə adanın qərb hissəsindəki Monte Solaro zirvəsinin yamaclarında yerləşən daha sakit hissədir. Ada Marina Grande, Spiaggia di Marina Piccola və Bagni di Tiberio çimərlikləri məşhurdur.
Sorrento Neapol körfəzində populyar turizm məkanıdır. Şəhər kiçik keramika, krujeva və kakma dükanları ilə məşhurdur. Sorrento limon, portağal və zeytun bağlarının yerləşdiyi sıldırım qayalardakı möhtəşəm mənzərəsi ilə dənizə baxan yamacın ətəyində inşa edilən liman şəhərdir. Şəhəri ziyarət edən turistlər buradan Pompey, Amalfi sahili, Pozitano, Neapol, Paestum, Kapri və İskiya adalarına bərə gəmilərlə rahatlıqla səyahət edə bilirlər.
Bura Fridrix Nitsşenin “gülüşdən həzz aldığı” və fransız yazıçısı Stendalın “Yer səthinin ən gözəl yeri” kimi təsvir etdiyi şəhərdir. Sorrentoda təbiəti və dənizi ilə insanı heyran qoyan çoxlu gözəl çimərliklər var.
AZƏRTAC-ın xüsusi müxbiri
Kapri
Bölmənin digər xəbərləri
