İtaliyanın Lampeduza adasındakı immiqrantlar təxliyə edilir
Roma, 16 sentyabr, AZƏRTAC
İtaliyanın cənubundakı Lampeduza adasına dəniz yolu ilə gələn immiqrantların ölkənin digər bölgələrinə təxliyəsinə başlanılıb.
AZƏRTAC xəbər verir ki, bu həftə ərzində adaya qəbul olunan 6 mindən çox miqrantdan 500-ü Kataniya limanına, 700-ü isə Porte Empedokl limanına yola salınıb. Gün ərzində adadan, ümumilikdə, 2500 miqrant göndərilib.
Bundan başqa, ötən sutka adaya daha 84 miqrant gəlib. Hazırda adadakı düşərgədə 3800-dən çox mühacir var.
İtaliyanın Baş naziri Ciorcia Meloni ölkəsinin ilin əvvəlindən bəri miqrasiya təzyiqi ilə üzləşdiyini, hökumətin sahillərdə təcili olaraq fövqəladə tədbirlər görmək niyyətində olduğunu deyib. Baş nazir Avropa Komissiyasının sədri Ursula Fon der Lyayeni Lampeduza adasına səfərə dəvət edib.
Avropa Komissiyası isə adadakı vəziyyəti yerində müşahidə etmək üçün nümayəndə heyəti göndərəcəyini açıqlayıb.
Qeyd edək ki, son illərdə Şimali Afrikadan Avropaya qeyri-qanuni miqrasiya yollarından birinə çevrilən İtaliya ilin əvvəlindən bəri 125 minədək miqrant qəbul edib. Bu rəqəm ötən ilin eyni dövrü ilə müqayisədə iki dəfə çoxdur.
Bölmənin digər xəbərləri
