Jalə Əliyeva: Azərbaycan və Türkiyə birliyinin yazıldığı daha bir tarix
Bakı, 2 iyun, AZƏRTAC
Bir neçə gün əvvəl daha bir dostluq və qardaşlıq, birlik, bərabərlik və həmrəylik dastanı yazıldı. Bir daha “İki dövlət, bir millət” kəlamının sözdə deyil, əməldə ifadəsi, təzahürü yaşandı. Dünyada analoqu olmayan və yəqin ki, olmayacaq iki qardaş və dost dövlət yenidən birgə tarixi qələbəyə imza atdı.
Mayın 28-də - müstəqilliyimizin 104-cü ildönümündə hər zaman yanımızda olan qardaş Tükiyənin Prezidenti Rəcəb Tayyib Ərdoğan yenidən Azərbaycana səfər etdi. Bu səfərdə onunla bərabər, Vətən müharibəsinin Zəfərimizlə başa çatmasında böyük rolu olan “Bayraktar” PUA-larının yaradıcısı, “Baykar” şirkətinin texniki direktoru Selçuk Bayraktar və türk dünyasının fəxri, Nobel mükafatı laureatı, professor Əziz Səncər də iştirak edirdilər.
Bu sözləri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədr müavini, filologiya elmləri doktoru, professor Jalə Əliyeva deyib.
Deputat qeyd edib ki, onların bu səfərdə Azərbaycan və Türkiyə prezidentlərinin də qatıldığı tarixi “TEKNOFEST Azərbaycan” Aerokosmik və Texnologiya Festivalında iştirakı xüsusi əhəmiyyəti ilə seçilirdi və festivala xüsusi rəng qatırdı.
Müsəlman-Şərq dünyasında ilk demokratik respublikanın-Azərbaycan Xalq Cümhuriyyətinin qurulmasının 104-cü ildönümündə sevincimizə sevinc qatıldı, o vaxt olduğu kimi, bu dəfə də iki qardaş ölkə və onun liderləri bu bayramı bir yerdə qeyd etdilər.
Çıxışına “Bu gün Azərbaycanda bayram günüdür, Müstəqillik Günüdür, bizim ən əziz bayramımızdır. Bu bayramı ikiqat bayram edən əziz qardaşımın bizimlə bərabər olmasıdır. Xahiş edirəm, bütün Azərbaycan xalqı adından Türkiyə Respublikasının Prezidentini və onunla bərabər Azərbaycana gəlmiş bütün bacı-qardaşlarımızı səmimiyyətlə salamlayaq”, -deyə başlayan qalib sərkərdə, Müzəffər Ali Baş Komandan, Prezident İlham Əliyev bəyan etdi ki, 104 il əvvəl müsəlman aləmində Azərbaycan xalqı ilk Xalq Cümhuriyyətini qurdu. Amma əfsuslar olsun ki, Azərbaycan Xalq Cümhuriyyətinin ömrü uzun olmadı, iki ildən sonra süqut etdi və Azərbaycan öz müstəqilliyini itirdi.
Yalnız 1990-cı illərin əvvəlində Azərbaycanın dövlət müstəqilliyi bərpa edildi və 30 ildir Azərbaycan xalqı azad yaşayır, müstəqillik şəraitində yaşayır, öz həyatını özü qurur və müstəqillik yolu ilə inamla gedir. Bu 30 il ərzində də türk qardaşlarımız daim bizim yanımızda olublar. Biz 30 il ərzində bu dəstəyi, bu qardaşlıq dəstəyini hər zaman hiss etmişik, bu gün də hiss edirik və bu gün Türkiyə-Azərbaycan yenə də bir yerdədir.
Dövlətimizin başçısı diqqətə çatdırdı ki, Azərbaycan və Türkiyə yaxşı günlərdə də, çətin günlərdə də hər zaman bir-birinin yanındadır. Türkiyə-Azərbaycan qardaşlığı, birliyi xalqlarımız üçün əsas yol istiqamətidir, bölgə üçün, dünya üçün də çox önəmli amildir, təhlükəsizlik, sabitlik amilidir. Nə qədər Türkiyə və Azərbaycan bir yerdə inamla addımlasa, bölgəmizdə sülh və barış o qədər də möhkəm olacaqdır. Bunu biz və bütün dünya İkinci Qarabağ müharibəsi zamanı gördük.
“Mən dəfələrlə demişəm ki, Türkiyənin artan gücü bizi gücləndirir və biz bir-birimizə güc qataraq böyük dünya çapında bir güc mərkəzinə çevrildik”, - deyən Ali Baş Komandan, həmçinin bildirdi ki, Türkiyənin uğurlu inkişafı, ilk növbədə, Prezident Rəcəb Tayyib Ərdoğanın adı ilə bağlıdır.
Prezident Ərdoğanla qardaşlıq münasibətlərinin bütün Türkiyə və Azərbaycan xalqına örnək olmalı olduğunu bildirən dövlətimizin başçısı əminliklə qeyd etdi ki, bundan sonra da Türkiyə və Azərbaycan yüksələn xətlə ancaq və ancaq irəliyə gedəcək.
Eyni zamanda, festivalda çıxış edən Türkiyə Prezidenti Rəcəb Tayyib Ərdoğan dünyaya bir daha önəmli mesajlar verdi. Bəyan etdi ki, bölgəmizdə yeni bir səhifə açmağın vaxtıdır. Hədəf isə dayanıqlı sülhün təmin olunması, etimadın və mehriban qonşuluq əlaqələrinin qurulması, inkişafın sürətlənməsi ilə bölgəmizdə sabitliyin möhkəmləndirilməsidir. Bu hədəflərin həyata keçirilməsi üçün də Azərbaycanla sıx həmrəylik, təmas və koordinasiya davam etdiriləcək.
“Bəli, bizlər kədəri də, sevinci də bir olan, sözdə deyil, əməldə də qardaş olan iki dövlətik, iki xalqıq. Göylərdə nazlı-nazlı dalğalanan ayparalarımız kimi, biz eyni inancı bölüşən qədim bir millətin mənsublarıyıq. Eynilə Anadolu kimi, bura da bizim torpağımızdır. Eynilə Türkiyə kimi, bura da bizim Vətənimizdir”, - söyləyən Prezident Ərdoğan birmənalı və qətiyyətli şəkildə dedi ki, iki qardaşı hansısa hüdud ayıra bilməz.
“Eynilə doğulduğumuz yerlər kimi, bura da bizim öz yurdumuzdur. Eyni qaydada Türkiyənin hər bir qarışı da sizlərin Vətəniniz, yurdunuzdur. Türk millətinin qəlbindəki Azərbaycan sevgisini kim qoparıb ata bilər? Qardaşlar arasında kim məsafə qoya bilər? İki qardaşı hansı hüdud ayıra bilər? Könüllərimiz arasında kim sərhəd çəkə bilər?”, - deyən Türkiyə Prezidenti bununla bir daha birlik və bərabərliyimizi, həmrəyliyimizi bütün dünyaya bir daha bəyan etdi.
Bütün bunlar göstərir ki, 104 il əvvəl olduğu kimi, bu il də biz bu bayramı təntənəli şəkildə, möhtəşəm hisslərlə, qalib ölkənin və xalqın vətəndaşları kimi qeyd etdik. Bütün dünya Azərbaycan-Türkiyə birliyinin, həmrəyliyinin yenidən şahidi oldu. Gördü ki, Azərbaycan-Türkiyə qardaşlığını heç bir qüvvə sarsıda bilməz.
Deputat sonda vurğulayıb ki, Azərbaycan və Türkiyə bu günədək birliyi və bərabərliyi ilə çoxsaylı zəfərlərə imza atıb və bundan sonra daha möhtəşəm qələbələr qazanacaqdır.
Bölmənin digər xəbərləri
