JURNALİSTLƏR ARASINDA “BLİTS” ÜZRƏ ŞAHMAT TURNİRİNƏ START VERİLMİŞDİR
AZƏRTAC xəbər verir ki, iyunun 6-da Azərbaycan Şahmat Federasiyasında (AŞF) kütləvi informasiya vasitələri arasında Milli Olimpiya Komitəsinin (MOK) yaranmasının 15 və Prezident İlham Əliyevin Komitəyə rəhbərliyinin 10 illiyinə həsr olunmuş “Blits” üzrə şahmat turnirinə start verilmişdir.
MOK-un vitse-prezidenti Xəzər İsayev son illər idman sahəsində əldə edilmiş uğurlardan danışaraq bildirmişdir ki, Prezident İlham Əliyevin Komitəyə rəhbərlik etməsi hər şeyi kökündən dəyişmişdir. Azərbaycan idmançılarının beynəlxalq yarışlarda qazandığı böyük uğurlardan söz açan natiq, ölkəmizin müxtəlif bölgələrində inşa edilən, müasir standartlara cavab verən olimpiya komplekslərinin idmanımızın inkişafına verdiyi töhfələrdən danışmışdır.
X.İsayev vurğulamışdır ki, KİV nümayəndələrinin iştirakı ilə keçirilən bu turnirdə iyirmi nəfərə yaxın jurnalist mübarizə aparacaq, qaliblərə diplom və müxtəlif hədiyyələr təqdim ediləcəkdir.
İki gün davam edəcək yarışların hakimi AŞF-ın vitse-prezidenti, beynəlxalq dərəcəli hakim Faiq Həsənovdur.
Bölmənin digər xəbərləri
