DÜNYA
Kanada Rumıniyanın atom energetikasına 3 milyard dollar ayıracaq
Bakı, 20 sentyabr, AZƏRTAC
Kanada iki nüvə reaktorunun inşası üçün Rumıniyaya 3 milyard dollar ayıracaq.
AZƏRTAC xəbər verir ki, The Canadian Press agentliyinin məlumatına görə, artıq iki dövlət arasında müvafiq saziş imzalanıb. Razılaşmaya əsasən, Rumıniya bu vəsaiti Kanada kompaniyalarının məhsulları və xidmətləri üçün xərcləyə bilər.
Rumıniyanın energetika naziri Sebastyan Burcua Buxarestin enerji daşıyıcıları sahəsində Rusiyadan asılı olmadığını və öz qonşularına da bu məsələdə yardım edə biləcəyini deyib.
Yeni reaktorlar Rumıniyanın 1996-cı ildə istifadəyə verilən yeganə atom elektrik stansiyasında quraşdırılacaq. Hazırda orada Kanadanın “Candu” texnologiyası ilə qurulan və hər biri 700 meqavat enerji istehsal edən iki reaktor fəaliyyət göstərir. Onlar ölkənin elektrik enerjisinə tələbatının təxminən 20 faizini təmin edir.
Ötən həftə ABŞ Dövlət Departamentinin mətbuat katibi Mettyu Miller Rusiyadan enerji daşıyıcıları idxal edən bəzi Avropa İttifaqı ölkələrinin həmin tədarüklərdən tez bir zamanda imtina edə bilməyəcəklərini vurğulayıb.