Karantin dövründə mədəniyyət mərkəzləri fəaliyyətinin yeni mərhələsinə qədəm qoyur
Bakı, 20 aprel, AZƏRTAC
Bakı Şəhər Mədəniyyət Baş İdarəsi ciddi karantin rejimi dövründə tabeliyində olan mədəniyyət mərkəzlərinin fəaliyyətini internet üzərindən müzakirə edib.
İdarədən AZƏRTAC-a bildirilib ki, müzakirələrdə Baş İdarənin məsul işçiləri, mədəniyyət mərkəzlərinin rəhbərləri iştirak ediblər.
Görüşü Baş İdarənin rəisi Cəlil Məlikov açaraq videokonfrans iştirakçılarını salamlayaraq, onların bu çətin şəraitdə xalqa yorulmadan xidmət edərək, pozitiv əhval-ruhiyyənin qorunub saxlanılması ilə yanaşı, maarifçilik fəaliyyətlərini genişləndirmələrinə görə təşəkkürünü bildirib.
“Bu gün Azərbaycanda koronavirus infeksiyasının yayılmasının qarşısının alınması məqsədilə dövlət səviyyəsində həyata keçirilən tədbirlər mədəniyyət müəssisələrində çalışan mütəxəssislərdən işə yanaşmada ciddi dəyişikliklər etməyi, informasiya texnologiyalarının mühüm nailiyyətlərindən istifadə etməklə fəaliyyətlərini internet üzərindən qurmağı, evdən onlayn mədəniyyət mərkəzi yaradıb insanlara mədəni xidmət göstərməyi tələb edir.
Birinci mərhələdə biz buna nail olduq və mədəniyyət müəssisələrinin çətin günlərində əhalinin nikbin əhval-ruhiyyəsinin saxlanılmasına, onlara mənəvi dayaq olmasına yönəlmiş çağırışları dəstəkləməsi, yeni layihələrlə çıxış etməsi təqdirəlayiqdir. Lakin qarşıda mədəniyyət mərkəzlərinə yeni baxış, yeni strategiyaların işlənməsi və işə kreativ yanaşma, özünüinkişaf üzərində qurulan mədəniyyət mərkəzi modellərinin hazırlanması durur.
Bu mərhələlərin yerinə yetirilməsi üçün bilavasitə əhatə dairəsinin genişləndirilməsi, yerləşdiyi rayonun, qəsəbənin əhalisinin zövqünün, tələbatlarının, arzu və istəklərini öyrənməklə, onlara daha yaxın olub birlikdə fəaliyyət göstərmək, müəssisənin nüfuzunu yüksəltmək və auditoriyasını genişləndirmək istiqamətində ciddi-cəhdlə, peşəkarcasına işləmək lazımdır”, - deyə C.Məlikov bildirib.
İclas fəaliyyət istiqamətlərinin və yeni perspektivlərin müzakirəsi, müvafiq tapşırıq və tövsiyələrin verilməsi ilə yekunlaşıb.
Bölmənin digər xəbərləri
