Karyerasını bitirən güləş hakimi: “Qızıl fit” mükafatını alanda sanki Olimpiya çempionu olmuşdum - MÜSAHİBƏ
Bakı, 26 dekabr, AZƏRTAC
İki gün öncə karyerasını başa vuran Azərbaycanın tanınmış güləş hakimi Hicran Şərifov AZƏRTAC-ın suallarını cavablandırıb. Həmin müsahibəni təqdim edirik:
- Ötən gün 25 illik hakimlik karyeranızı bitirdiniz. Təəssüratlarınızı bilmək maraqlı olardı...
- Əlbəttə ki, mən bu 25 ili sevinclə xatırlayacağam. Çünki bu illər ərzində xalqıma, Prezident İlham Əliyevə və Azərbaycan idmanına xidmət etmişəm. Ədalətli hakimlik etmək üçün çalışırdım. Çünki mən Azərbaycanı təmsil edirəm. Hər dəfə yüksək kateqoriya əldə edəndə sevincimin həddi hüdudu olmurdu. Sanki dünya və ya Olimpiya çempionu olurdum. Həmişə öz üzərimdə işləmişəm. Hər zaman ən yaxşısı olmağa çalışırdım.
- Yaxşı güləş hakimi olmaq üçün ilk növbədə nələrə diqqət yetirmək lazımdır?
- Qərəzli hakim olmağı heç vaxt arzulamamışam. Mənim üçün ilk növbədə ədalətli olmaqdır. Heç vaxt yalnız özümü düşünməmişəm. Beynəlxalq aləmdə də belədir. Referi təkcə özünü düşünməməlidir. Məşqlərdən də heç vaxt yayınmırdım. Formada olmaq üçün yediyim qidalara fikir verirdim. Bir sözlə, mən hakimlik üçün yaşayırdım. Bunları dünyada sayılıb-seçilən hakim olmaq üçün edirdim. Şükürlər olsun ki, bu mənə qismət oldu. Bir neçə dəfə yarışların ən yaxşı hakimi tituluna sahib çıxdım. Ölkə üzrə də ən yaxşısı oldum. Nəhayət, "London-2012" Yay Olimpiya Oyunlarında ən yaxşı hakim seçildim.
- "London-2012" Yay Olimpiya Oyunlarında ən yaxşı hakim seçildiyinizi vurğuladınız. Həmin anları necə xatırlayırsınız?
- Mən həmin an elə hiss etdim ki, sanki qızıl medal qazandım. Bu, olduqca əlçatmaz, böyük əziyyət və zəhmət hesabına əldə olunan uğurdur. Hər kəs məni təbrik etmişdi. Təqdimat zamanı Azərbaycan Güləş Federasiyasının vitse-prezidenti Namiq Əliyev və Milli Olimpiya Komitəsinin vitse-prezidenti Çingiz Hüseynzadə də orada idilər. Hətta Ç.Hüseynzadə Prezident İlham Əliyevə zəng edərək, artıq ilk qızıl medalımızı qazandığımızı demişdi. Sevincimdən yerə-göyə sığmırdım. Həmin an dövlətimizin başçısı yarışların başlayıb-başlamadığını soruşdu. Çingiz Hüseynzadə isə cavabında dedi ki, yarışlardan öncə hakimlərin təqdimat mərasimi oldu və Hicran Şərifov ən yaxşı seçildi. Prezident bu münasibətlə məni təbrik etdi və “Şöhrət” ordeni ilə mükafatlandırdı. Prezident İlham Əliyev, Birinci vitse-prezident Mehriban Əliyevaya həmişə məni diqqətdə saxlayıblar, qayğılarını əsirgəməyiblər. Mən də ildən-ilə daha artığını etmişəm. Bu 25 ildə bütün tələblərə uyğun keyfiyyətli hakim olmağa çalışmışam. Fikirləşirdim ki, bir nömrə olmalıyam. Şükürlər olsun ki, Allah bunu mənə qismət etdi. Artıq bundan sonrakı fəaliyyətimdə idmanın nəzəriyyəsinə xidmət edəcəyəm. Azərbaycan İdman Akademiyasının baş müəllimiyəm. Bu sahədə ali elmi dərəcəm var. Tələbələrimizi hazırlayıram. Əvvəl sadəcə güləşə xidmət edirdimsə, indi bütün idman növlərinə xidmət edirəm. Nə qədər ki, özümdə güc hiss edirəm, ömrümü idmana, dövlətimə, xalqıma, təhsilə həsr edəcəyəm.
- Neçə müddətdir Azərbaycan İdman Akademiyasında işləyirsiniz?
- Artıq 3 ildir burada işləyirəm.
- “Qızıl fit” mükafatı verilərkən, hansı kriteriyalar nəzərə alınır?
- Ümumiyyətlə, bütün yarışlardan öncə hakimlər üçün kiçik bir seminar keçirilir. “Qızıl fit”i mənə yalnız bir epizoda görə vermədilər. Güləş aləmində belə deyil. Bunu əldə edə bilmək üçün ilk növbədə, dünya və Avropa çempionatlarında, lisenziya xarakterli turnirlərdə özünü doğrultmalısan. Baxırlar ki, sən inkişaf edirsən və qüsursuz hakimlik nümayiş etdirirsən. Beləliklə də, sonda nəticə çıxarılır. Təbii ki, burada yalnız bir nəfərin qərarı nəzərə alınmır. Bu, bizim istəyimizlə əldə olunan bir şey də deyil. Bu məsələyə birbaşa Dünya Güləş Birliyi nəzarət edir. Hansı hakim bu titula daha çox layiqdirsə, onu seçirlər. Buna layiq olmaq üçün səhvsiz, işində peşəkar və qətiyyətli olmalısan. Ən yaxşı hakim məhz bu kateqoriyalara əsasən seçilir.
- İdarə etdiyiniz görüşlər arasında sizin üçün ən unudulmazı hansı idi?
- İranda keçirilmiş beynəlxalq turnirdə 3-cü kateqoriyaya sahib gənc, istedadlı hakim idim. Artıq qərar verilmişdi ki, ağır görüşlər zamanı Azərbaycandan məni hakim təyin etsinlər. Orada amerikalı və iranlı Olimpiya çempionları üz-üzə gəlirdilər. Bu idmançıların final qarşılaşması mənim üçün unudulmaz olmuşdu.
- Karyeranız ərzində məyusedici məqam hansı olub?
- Bir az çətin sual oldu. Mən bütün görüşləri izləyirdim. Keçmiş sərbəst güləşçimiz Namiq Sevdimov “Pekin-2008” Yay Olimpiya Oyunlarında 5-ci oldu. Əslində, o, qızıl medala layiq idi. Sadəcə, özündən zəif rəqibə uduzaraq, bürünc medal şansını itirdi. Finala çıxsaydı, amerikalı idmançını məğlub edəcəkdi. Bu məqam məni məyus edir. Lakin hakim kimi üzüldüyüm hadisə olmayıb.
- Yarışlardan xatirə saxladığınız əşyalar varmı?
- Deməli, "London-2012" Yay Olimpiya Oyunlarında mənə təqdim olunan “Qızıl fit”i tarix Milli Azərbaycan Tarix Muzeyinə bağışladım. Hətta həmin fitlə bir görüş də idarə etmişdim. Bir də İngiltərə paytaxtında təşkil olunmuş yarışdan öncə verilən digər fiti isə Azərbaycanın istedadlı fotoqraflarından birinə vermişəm. Geyim isə hazırda özümdə qalır. Tarix Muzeyindən formamı istəsələr də, hələlik bu barədə konkret qərara gəlməmişəm.
- Özünüz üçün ideal hesab etdiyiniz hakimlər olub?
- Türkiyədən İbrahim Cicioğlunu çox bəyənirdim. Yerlilərdən isə mərhum Oqtay Hüseynovu qeyd edərdim. Onun verdiyi qərarlar heç vaxt müzakirəyə çıxarılmırdı.
- Azərbaycan güləş hakimliyinin hazırkı durumu barədə nə deyə bilərsiniz?
- Hazırda Azərbaycan Güləş Federasiyası bununla bağlı əlindən gələni edir. Artıq yeni gənc hakimlər yetişdirilir.
Bölmənin digər xəbərləri
