Kembric Universiteti gələn təhsil ilinin sonunadək əyani mühazirə keçirməyəcək
Bakı, 20 may, AZƏRTAC
Kembric Universiteti koronavirus təhlükəsi səbəbindən gələn təhsil ilində də əyani mühazirələr keçirməyəcək.
AZƏRTAC BBC telekompaniyasına istinadla xəbər verir ki, bu barədə məlumat Kembric Universitetinin bəyanatında yer alıb.
Buna baxmayaraq, tələbələr mühazirələrdə online şəkildə iştirak edə biləcəklər. Həmçinin universitet rəhbərliyi sosial məsafə saxlamaq şərti ilə kiçik tələbə qrupları şəklində əyani dərslərin təşkili imkanlarını da nəzərdən keçirir.
“Planlaşdırmanı yüngülləşdirmək üçün qərar indi verilib. Lakin koronavirus barədə rəsmi tövsiyələr dəyişərsə, hər zaman olduğu kimi, qərara yenidən baxıla bilər”, - deyə universitetin bəyanatında bildirilir.
Qeyd edək ki, Kembric Universiteti koronavirus pandemiyası səbəbindən mart ayında distant təhsil qaydasına keçib. Həmin vaxtdan universitet şəhərciyi bağlanıb. Tələbələr imtahanları internet vasitəsi ilə verir.
BBC telekompaniyasının məlumatına görə, bundan öncə Mançester Universiteti də analoji qərar vermişdi.
Bir qədər əvvəl Böyük Britaniyanın Tələbə İşləri üzrə İdarəsi tələbələri yanıltmamaq üçün ali təhsil müəssisələrindən dərslərin hansı formada keçiriləcəyi barədə dəqiq məlumat vermələrini tələb etmişdi.
Bölmənin digər xəbərləri
